Kal. Nunaanni Eqqartuussiviit

Eqqartuussisooqataasutut eqqartuussisooqataasoq alla aamma eqqartuussisoq peqatigalugit eqqartuussivimmi suliassat aalajangiiffigisassavasi.

Eqqartuusseqataasartoorusuppit?

Eqqartuussisooqataasartuunissamik eqqarsaateqaruit – taava ataaniittoq atuaruk

Eqqartuussisooqataasartutut eqqartuussivimmi suliani pinerluttulerinermi suliani aalajangeeqataasassaatit, kisianni annikitsumik saqitsaannermi sulianut aamma aggersarneqartarsinnaassaatit.

Eqqartuussisooqataasartut immikkut eqqartuussinermi sulianut imaluunniit inatsisinut ilisimaqartariaqanngillat. Eqqartuussisooqataasartut suliassaraat nalinginnaasumik innuttaasut paasinninnerattut suliat eqqartuussutigineqarnissaannut tapersiissallutik.

Pinerluttulerinermi suliami eqqartuussisooqataaguit, pineqartullu pisuutinnera aalajangerlugu, taava pineqartup inatsimmik unioqqutitsineranut pineqaatissiissutigineqartussaq aalajangeeqataaffigissavat. Suliaq taanna pingaaruteqarpoq – suliamut ataasiakkaamut tassungalu unnerluutigineqartumut.

Kina eqqartuussisooqataasartunngorsinnaava?

Innuttat nalinginnaalluinnartuupput eqqartuussisooqataasartuunissamik suliakkerneqartartut. Taamaattorli aalajangersimasunik piumasaqaateqarpoq, eqqartuussisooqataasartunngorniaruit naammassisinnaasassannik.

Pingaarnertullu eqqartuussisartooqataasinnaanngilatit, Inatsisartuni ilaasortaaguit, politiini atorfeqaruit, pineqaatissinneqarsimasunut isumaginnittoqarfimmi, imaluunniit eqqartuussissusilerisuuguit. 

Tamatuma saniatigut piumasaqaataavoq:

  • Kalaallit Nunaanni najugaqarnissat
  • 18-inik ukioqalereersimanissat
  • Siusinnerpaamik 2026-mi 70-inik ukioqalertussaannginnissat
  • Tusaamanerlugaassanngitsutit, ima naliginnaasumik paasineqassalluni, pinerluttulerinermi suliami eqqartuunneqarsumasuussanngitsutit

Soqutiginnippit?

Kalaallit Nunaata Eqqartuussiviani imaluunniit eqqartuussisoqarfimmi eqqartuussisooqataasartussatut piukkunneqarsinnaavutit qinnuteqarnermi immersugassaatitta, pinerluuteqarsimasullu nalunaarsorneqarfiannut paasissutissanik ilinnut tunngasunik eqqartuussiviup piniarsinnaaneranut akuersissutip atsiorneratigut, taamaalilluni eqqartuussivik pinerluuteqarsimasunik nalunaarsorneqartarfiannut paasissutissanik ilinnut tunngasunik piniarsinnaanngortillugu. Qinnuteqarnissamut paasissutissanillu piniartoqarsinnaaneranut akuersinissamut immersugassat uani nassaarisinnaavatit - qinnuteqarnermi immersugassaq aammalu akuersissuteqarnermik nalunaarut.

Eqqartuussisoqarfimmi Kalaallit Nunaanni Eqqartuussivimmiluunniit eqqartuussisooqataasartoorusukkuit, Kalaallit Nunaanni Eqqartuussivimmut saaffiginninnissannut info@domstol.gl-imut saaffiginninnissannut tikilluaqqusaavutit.

Nunatta Eqqartuussisuuneqarfiani eqqartuussisooqataasartoorusukkuit, eqqartuussisuuneqarfimmut post.landsret@domstol.gl-mut saaffiginninnissannut tikilluaqqusaavutit.

Innuttaasunik ataatsimiisitsineq

Ammasumik innuttaasunut paasissutissiinermilu ataatsimiisitsisoqassaaq, eqqartuussisoqarfimmi imaluunniit Kalaallit Nunaanni Eqqartuussivimmi eqqartuussisooqataasarnermut tusagaqarneruffigisinnaasannik.

Ataatsimiisitsinerit pissapput:

Ilulissat, ulloq 12. august 2021

Nuuk, ulloq 19. august 2021

Qaqortoq, ulloq 26. august 2021

Sisimiut, ulloq 2. september 2021

Nunatta Eqqartuussiveqarfii eqqartuussisooqataasussanik atorfissaqartitsipput. Isiginnaagassiaq ataaniittoq takuuk 

Eqqartuussisooqataasup suliassaa

Eqqartuussinissaq sioqqullugu piareersartoqassava?

Eqqartuussisooqataasartutut aalajangiinernik eqqortunik aalajangeeqataasarnissannut, pingaartorujuuvoq eqqartuussivimmut siullermeerlutit takkutsinnak, ilitsersuussutip ilinnut nassiunneqartup sukumiisumik atuarnissaa.

Ilitsersuut uani atuaruk

Suliani sorlerni eqqartuussisooqataasartunit peqataaffigineqartarpat?

Pinerluttulerinermi suliani ilungersunartuni eqqartuussisooqataasartut peqataasarput, unnerluussisussaatitaasut unnerluutigineqartup akiliisitsinermiit sukanganerusumik pineqaatissinneqarnissaa kissaatigingaangassuk. Eqqartuussisuttaaq aalajangersinnaapput, suliami immikkut unnerluutigineqartumut akuliuffiginniffiusuni aalajangiinissani eqqartuussisooqataasartut peqataanissaannik.

Sooq eqqartuussiviit eqqartuussisooqataasartunik atuisarpa?

Eqqartuussisooqataasartut peqataassapput inuiaqatigiit kalaallit ataatsimut naapertuuttutut isigisaat aallaavigalugu, eqqartuussivimmi suliani aalajangiinerit pisaqqullugit. Eqqartuussisooqataasartut naliginnaasumik inuiaqatigiit kalaallit akornanni isummertarnermut sinnersaassapput.

Pisuuneq aalajangiinerlu isummerfigineqassappat?

Eqqartuussisup eqqartuussisooqataasartut inatsisit pineqaatissiisarnermilu periusiusut naliginnaasut pillugit ilitsersussavai. Eqqartuussisooqataasartut eqqartuussisup ilitsersuutai nalunngeqatiginnissutertillu tunuliaqutaralugit aalajangernertik aalajangertassavaat.

Suliaq aalajangiiviginerani, eqqartuussisooqataasartut eqqartuussisorlu tamarmik ataatsimik taasissutissaqarput – unnerluutigineqartup pisuuneranut apeqqummut tunngatillugu, aamma pineqaatissiissutaasinnaasup suunissaanik aalajangiinissamut apeqqummut tunngatillugu, assersuutigalugu pineqaatissinneqarsimasunut inissiisarfimmiittussanngortitsinermik. Eqqartuussisooqataasut marluk unnerluutigineqartup pinngitsuutinneqarnissaanik taasisut, eqqartuussisoq pisuutitsinissamik taasisoq, eqqartuussut pinngitsuutitsinerussaaq.

Qanoq eqqartuusseqataasartunngortarpat?

Eqqartuussisooqataasartut ukiut sisamakkaarlugit innersuussutigineqartarput.

Kalaallit Nunaanni Eqqartuussiviani eqqartuussisoq pisortap, inuit pineqartut eqqartuussivinni suliarinneqqaarfiusuni, eqqartuussisoqarfinni eqqartuussisooqataasartussatut atuussinnaasutut piukkunnartutut isigisaat innersuussutigisarpai. Eqqartuussisoqarfiit eqqartuussisooqataasartui kommunalbestyrelsinit toqqarneqartarput.

Kalaallit Nunaanni Eqqartuussivimmi eqqartuussisooqataasartut Kalaallit Nunaanni Eqqartuussivimmi eqqartuussisup pisortap innersuussutigisarpai.

Eqqartuussisuuneqarfimmi eqqartuussisooqataasartut eqqartuussisuunermit innersuussutigineqartarput.

Kalaallit Nunaanni Eqqartuussivimmi eqqartuussisuuneqarfimmilu eqqartuussisooqataasartut Inatsisartunit toqqarneqartarput.

 

 

Eqqartuussisooqataaguma akissarsissaanga?

Aningaasarsiat annertussusii:
700 koruunit nal. ak. sisamat tikillugit ullormi sulisimagaani
1.100 kroner nal. ak. sisamat qaangerlugit ullormi sulisimagaanni

Aningaasarsiat tunniunneqartarput Namminersorlutik Oqartussanit, eqqartuussisoqarfinniit nalunaarutigineqaraangata.

Qinnuigineqaruit illoqarfimmut allamut aallaqqullutit eqqartuussivimmi peqataanissat siunertaralugu taava angalanermi aningaasartuutitit utertinneqassapput ullormusiassallu, Kalaallit Nunaanni sulilluni angalanermi atortut malillugit, pissavatit.

Paasissutissat kingulliit: 03. aggustip 2021