Kal. Nunaanni Eqqartuussisoqarfiit

Kal. Nunaanni Eqqartuussiviit

Eqqartuussisooqataasutut eqqartuussisooqataasoq alla aamma eqqartuussisoq peqatigalugit eqqartuussivimmi suliassat aalajangiiffigisassavasi.

Eqqartuussisooqataasutut amerlanerpaatigut pinerluttulerinermi suliassanik aalajangeeqataasartuusussaassaatit, kisiannili aamma annikinnerusumik saqitsaannermi suliassat pillugit aggersarneqartassaatit.

 

Eqqartuussisooqataasup suliassaa

Eqqartuussisooqataasutut suliassat

Eqqartuussisooqataasutut eqqartuussisooqataasoq alla aamma eqqartuussisoq peqatigalugit eqqartuussivimmi suliassat aalajangiiffigisassavasi.

Pinerluttulerinermi suliassami eqqartuussisooqataaguit, isumaqarussilu inuk pisuusoq, taava pineqartup inatsimmik unioqqutitsisimaneranut pineqaatissiissutissamik aalajangeeqataassaatit. Taamatut sulinissaq pingaaruteqartorujussuuvoq – suliamut aammalu unnerluutigisamut ataatsimut.

Pinerluttulerinermi suliassani, unnerluussisussaatitaasut kissaateqarsimappata pineqaatissiissummik annertunerusumik soorlu inissiisarfimmut inissiinermik pineqaatissiisoqassasoq, eqqartuussisooqataasut peqataassapput, imaluunniit immikkut ittumik pineqaatissiissutissaq unnerluutigisamut killiliisuuppat imaluunniit inuiaqatigiinnut tamanna immikkut soqutiginarpat.

Eqqartuussisooqataasutut peqataaffigissavarsi, eqqartuussiseriaatsip kalaallit inuiaat ataatsimut naapertuilluarnermik paasinneriaasiat naapertorlugu ingerlanneqarnissaa.

Eqqartuussisooqataasutut aalajangiinerit eqqortuusut aalajangiunneqartarnissaannut pingaarutilerujussuuvoq, Kalaallit Nunaanni Eqqartuussivimmit nassiussarsiat ilitsersuut, atuarsimanissaa, eqqartuussivimmut siullerpaamik naapigutinnginninni. Ilitsersuut aamma unnga kakkersuunneqarpoq.

Eqqartuussut oqaatigineqaraangat eqqartuussisooqataasut eqqartuussisorlu tamarmik immikkut ataatsimik taasisinnaapput – apeqqutini, unnerluutigisaq pisuutitaassanersoq, aamma pineqaatissiinissamut apeqqutip aalajangiiffiginiarnerani (assersuutigalugu inissiisarfimmut inissiiineruppat). Eqqartuussisooqataasut assersuutigalugu unnerluutigisaq pinngitsuutinniarlugu taasigunik, eqqartuussisorlu pisuutitsiniarluni taasilluni, eqqartuussut pinngitsuutitsinerussaaq.

Eqqartuussisooqataasutut pinngitsuutitsinissaq taasissutigisimagukku, eqqartuussisooqataasulli aappaata eqqartuussisoq peqatigalugu pisuutsitsillutik taasippata, taava pineqaatissiissutissamik apeqqutip aalajangiiffigineqarnissaa aalajangiiffigeqataasussaavat.

Kalaallit Nunaanni Eqqartuussivimmi Eqqartuussisoq ukiut sisamakkuutaartuumik inuit, eqqartuussivinni eqqartuussisooqataasartussatut piukkunnartut, qassiugaluarnersut inassutigisarpai eqqartuussisooqataasartussatut toqqarneqarnissaat. Eqqartuussisooqataasartut kommunalbestyrelsinit naggataatigut toqqarneqartarput.

Kalaallit Nunaanni Eqqartuussivimmi aamma nunap eqqartuussisuuneqarfiani eqqartuussisooqataasartussat Inatsisartunit qinerneqartarput. Nunap eqqartuussisuuneqarfiani eqqartuussisooqataasartussat nunap eqqartuussisuuneranit inassutigineqaqqaartarput.

 

Eqqartuussisooqataaguma akissarsissaanga?

Eqqartuussisooqataasutut eqqartuussinermi peqataagaangavit eqqartuussisoqarfinniit akissarsitinneqartussaavutit

Aningaasarsiat annertussusii:

700 koruunit nal. ak. sisamat tikillugit ullormi sulisimagaani
1.100 kroner nal. ak. sisamat qaangerlugit ullormi sulisimagaanni
Aningaasarsiat tunniunneqartarput Namminersorlutik Oqartussanit, eqqartuussisoqarfinniit nalunaarutigineqaraangata.

Qinnuigineqaruit illoqarfimmut allamut aallaqqullutit eqqartuussivimmi peqataanissat siunertaralugu taava angalanermi aningaasartuutitit utertinneqassapput ullormusiassallu, Kalaallit Nunaanni sulilluni angalanermi atortut malillugit, pissavatit.

Paasissutissat kingulliit: 17. marsip 2020