Kal. Nunaanni Eqqartuussiviit

Uppernaasaatissaqaruit aningaasanik akiitsoqarfigineqarlutit eqqartuusummik naammassititsiniaanermi eqqartuussivik noqqaavigisinnaavat akiliisitsiniaqqullugu. Pisariaqartilersinnaavat akiitsoqartoq nammineerluni akiliinngippat.

Uppernarsaatit, akiitsulimmit aningaasanik pisassaqarlutit, taaneqartarpoq toqqammavik. Akilissitsiniarnermi suliamit saqitsaannermiluunniit suliamit eqqartuussutaasinnaavoq. Aamma allagaq uppernarsaataasinnaavoq, tassani akiitsoqartoq atsiorsimalluni uppernarsarlugu, ilinnut aningaasanik akiitsoqarluni.

Akiliisitsiniartarfimmut noqqaassummik tunniussaqarneq qanoq akeqarpa?

Eqqartuussutip naammassineqarnissaanik noqqaassummik akiliisitsiniarnermi eqqartuussivimmut tunniussiguit, eqqartuussivimmut akitsuummik 300 koruuninik akiliissaatit.

Qanoq akiliisitsiniarnermi eqqartuussiviup aningaasat akilersinniassavai?

Akiliisitsiniarnermi eqqartuussiviup aningaasat ilinnut akilerneqartinniassavai, assersuutingalugu akiitsullip pigisaanik taarsiisitsinikkut. Akiitsullip ingerlaannaq akiitsuni tamakkiisumik akilersinnaanngippagit, naafferartumik akilersuinissamik isumaqatigiissusiortoqarsinnaavoq. Piumasarisinnaavat pigisat taarsiutigineqartussatut aalajangikkat tuniniarneqarnissaannik, akiitsullip akiitsuminik naafferaalluni piffissaq eqqorlugu akilinngippagit.

Akiitsulimmi akiliisinnaanngippat?

Akiitsulik nalilinnik pigisaqanngippat akiliisinnaassuseqanngippallu, suliaq naammassineqassaaq, ilinnullu tunngavik utertinneqassaaq. Akiliisitsiniarnermik suliamik nutaamik aatsaat ukiup affaata qaangiunnerani aallartitsinnaavutit suliaq nassiuteqqillugu nutaamillu eqqartuussivimmut akitsuummik akileeqqillutit. Akiitsuli suli akiliisinnaassuseqanngippat, akiliisitsiniarnermilu eqqartuussiviup tamanna pillugu pigisanik taarsiissuteqarnissaq itigartutsissutigippagu taakku anigaasat ilinnut itertinneqassapput.

Sunik allanik akiliisitsiniarnermi eqqartuussivimmi suliaappat?

Tuniniaasoq pigisamik naafferartumik akilersugassatut tunisaqarsimaguni, assersuutigalugu biilimik, pisisullu naafferartumik akilersukkani piffissaq eqqorlugu akilinngippagit, tunisisup akiliisitsiniarnermi eqqartuussivimmiit ikiorneqarsinnaavoq pigisap utertinniarnerani.
Attartortup ineqarnermut akiligassani piffissaq eqqorlugu akilinngippagu, attartortitsisup akiliisitsiniarnermi eqqartuussivimmut attartortoq anisitsissinnaavaa.
Akiliisitsiniarnermi eqqartuussivik aamma illulianik pinngitsaaliissummik akitsorterisitsisarpoq.
Piginneqqaartussaaneq erseqqissumik aalajangerneqanngikkaluartoq, akiliisitsiniarnermi eqqartuussivik taamaattoqartillugu piginneqqaartussaanermik qulakkeeringallarnissamik ikiuussinnaavoq.

Suliaq sumi suliakkiutigineqassava?

Eqqartuussisoqarfimmi akiliisitsiniarnermi suliat amerlanerpaartaat suliarineqartarput.
Taamaattorli suliat akiliisitsinermut tunngasut arsaarinnissuteqarnermillu piumasaqaatit politiinut suliakkiutigineqassapput.
Suliat isertitsivimmiisitsinermut tunngasut, uppernarsaatinik qulakkeerinerit, inerteqqutit qularnaveerusiinerillu atorsinnaasut aamma pigisanit nuunneqarsinnaasunit allaanerusunik, tassa imaappoq assersuutingalugu illumik, pinngitsaaliissummik tuniniaanerit Kalaallit Nunaanni Eqqartuussivimmut suliakkiutigineqassapput.
Kalaallit Nunaanni akiisorsiinerit suliarineqarsinnaanngillat. Taammaattoq akiisorsinerit siullermeerluni aappassaanneerlunilu qallunaat eqqartuussiviinit uppernarsarlugit atsiukkat, eqqartuussisoqarfimmut tunniunneqarsinnaapput eqqartuussutip naammassineqarnissaa siunertaralugu. 

Paasissutissat kingulliit: 30. juunip 2020