Kal. Nunaanni Eqqartuussisoqarfiit

Kal. Nunaanni Eqqartuussiviit

Suliani suugaluartuniluunniit ilisimannittutut aggersarneqarsinnaavutit, ilisimannittutullu nassuiaatit eqqartuussummut pingaaruteqarsinnaavoq.

Ataani atuakkit ilisimannittutut ilisimasariaqakkat

Ilisimannittuuguvit

Ilisimannittuuguvit

Saqitsaannermi, pinerluttulerinermi suliassaasinnaapput aamma akiliisitsiniarnermi eqqartuussiviusinnaavoq kingornussassalerinermilu eqqartuussiviusinnaaluni.

Pisussaavutit eqqartuussivimmi najuutissallutit tassani piffissamilu aggeqqusissummi allassimasutut. Aamma tamanna atuuppoq, isumaqaraluaruilluunniit suliamut pingaarutilinnik paasissutissiisinnaanak, imaluunniit siusinnerusukkut eqqartuussisunut imaluunniit politiinut nassuiaateqareersimagaluaruit.

Naapigutinngitsoorsinnaavutit peqqutissaqavikkuvit. Peqqutissavik tassaasinnaavoq assersuutigalugu napparsimaneq, tamannalu nakorsap allagarsiussaanik uppernarsarsinnaasat. Nalinginnaasumik ulapaarneq, niuerniarluni ataatsimiinnerit assigisaallu agginngitsoornermut peqqutissaviunngillat. Naapigutinngitsoornissannut peqqutissaqavikkuit, sapinngisamik piaarnerpaamik eqqartuussisut imaluunniit taanna, ilinnik aggeqqusisimasoq, soorlu assersuutigalugu eqqartuussissuserisoq politiilluunniit nalunaarfigissavatit. Nalunaarsinnaavutit oqarasuaatikkut.

Eqqartuussinermut naapigutinngitsooruit, naatsorsuutigisariaqassavat akiliisitsissummik eqqartuussaanissat. Aamma naatsorsuutigisinnaavat politiinit aaneqarnissat, taamatuttaaq eqqartuunneqarsinnaavutit aningaasartuutit, agginngitsoornikkut akilerneqartariaqarsimasut, ilinnut akiligassanngortinneqarnerinik.

Eqqartuussisunut naapigunnissat piareersarsimaffigissavat
Eqqartuussisunut naapigutinnginninni suliamut tunngasumik eqqaamasatit eqqaaniarsarissavatit. Assersuutigalugu allattukkat, allakkat, pappilissat uppernarsaatit assigisaallu atuarsinnaavatit. Akerlianilli qanoq pisoqarsimanera pillugu allanik oqaloqateqassanngilatit.

Aggeqqusissut nassiunneqassaaq eqqartuussisunit, politiinit imaluunniit eqqartuussissuserisumit.

Ilisimannittutut kinaassutsinnik isertorsinnaavit?

Isumannaatsuunissannut aalajangiisuussappat, najukkat, atit atorfiillu pinerluttulerinermi suliami unnerluutigisamut oqaatigineqannginnissaat, kinaassutsit isertorlugu ilisimannittuusinnaavutit

Aallaaviuvoq illuatungeriit kinaassutsivit ilisimanissaat suliami ilisimannittutut sassaruit.

Eqqartuussisulli aalajangersinnaapput, ilisimannittuusinnaasutit kinaassutsit isertorlugu. Tamatumani piumasaqaataavoq, isumannaatsuunissavit tamanna pisariaqartippagu, paasissutissallu taakku unnerluutigisap illersuisuanut pingaaruteqanngikkaangata.

Isumaqaruit, kinaatsutsit unnerluutigisamut oqaatigineqassanngitsoq, taava politiinut imaluunniit eqqartuussivimmut saaffiginnissaatit. Toqqammavigisassatut illersuisuit imaluunniit eqqartuussissuserisuit tamatuminnga aamma ikiorsinnaavaatit.

Misigigukku, pasisap ataatsip arlallilluunniit imaluunniit unnerluutigisap sioorasaaraatit, pingaaruteqarpoq tamanna ingerlaannaq politiinut nalunaarutigissagit.

Pingaaruteqarpoq – immaqa tamatuma kingunerisariaqassammagu, annertunerusumik illersorneqarnissat.

Eqqartuussisoqarfiit ilisimannittunik sioorasaarinerit ilungersunarluinnartutut isigaat, taamaattumillu sakkortunerusumik pineqaatissiinermik kinguneqartissinnaasarlugu.

Sioorasaarneqarsimagaluaruilluunniit, taasa pisussaaffigivat eqqartuussisunut ilisimannittuunissat.

Ilisimannittutut akissarsiaqassavit?

Ilisimannittutut inersimasutut pisinnaatitaavutit ilisimannittutut akissarsisinneqarnissamik nalunaaquttap akunneranut 96,07 koruuninik annertussusilimmik. Eqqartuussisut aningaasat qaffassinnavaat nalunaaquttap akunnera kingulleq aallartippat.

15-it 18-illu akornanni ukioqaruit nalunaaquttap akunneranut akissarsisinneqassaatit 66,28 koruuninik.

Illoqarfimmi nunaqarfimmiluunniit allami, najugaqarfiginngisanni, ilisimannittuussaguit, eqqartuussisut angalanermi aningaasartuutit akilissavaat. Tamatuma saniatigut ullormusiaqartinneqassaatit ullup affaanut annertussuseqartunik 255,15 koruuninik piffissami ilisimannittutut angalaffigisariaqarfigisanni.

Ilisimannittutut akissarsianut malittarisassat atuupput apeqqutaatinnagu suliami sorlermi eqqartuussivimmi, Kalaallit Nunaanni Eqqartuussivimmi imaluunniit nunap eqqartuussisuuneqarfiani, ilisimannittuusariaqarnersutit.

Paasissutissat kingulliit: 05. marsip 2020