14 jun 2022
Nunatta Eqqartuussisuuneqarfia
Aanngaajaarniutit pillugit - K 008/19
Angut 55-nik ukiuklik Qaasuitsup Eqqartuussivianit pisuutinneqarpoq Danmarkimiit nunatsinnut hashi 4,978 kg eqqussimammagu. Hashi nassatani toqqorneqarsimavoq.
Eqqartuussissut Nunatta Eqqartuussisuuneqarfianit oqaatigineqarpoq ulloq 21. februar 2019
Pisuunermik apeqqut
Eqqartuussisuuneqarfik isumaqarpoq, unnerluutigineqartup isumaqatigiissusiorsimanermigut hashimik eqqussiniarluni aammalu poortukkanik pingasunik tunissutissat puuinik poortorneqarsimasunik tigusinermigut ilimagisimassagaa poortukkat 1 kg-mit annertunerusumik imaqarsimaneri. Eqqartuussisuuneqarfik isumaqarpoq ilaatigut annertuumik mianersuaalliornerusoq hashimik eqqussineq, ilaatigullu qulakkeersimanngimmagu tunniunneqartup annertussusia isumaqatigiissutigineqartumut naapertuuttuunera. Taamaalilluni eqqartuussisuuneqarfiup eqqartuussisoqarfiup uppernarsaasiissutinik naliliinera atuuttussanngortippaa.
Pineqaatissiissut pillugu
Aallaqqaasiutitut oqaatigineqassaaq, eqqartuussisarnermi periuserineqartarmat Kalaallit Nunaanni aanngaajaarniutit pillugit inatsimmi pineqaatissiissutip sivisussusilerneqartarnera sakkortunerummat, inatsimmi pineqartumi Danmarkimi atuuttumut naleqqiullugu, tamatumunngalu Højesteret pissutissaqarsimanngilaq uparuaateqarnissaminut, tak. U 1996.424 H.
Periuseq nalinginnaasoq malillugu aallaavittut siullermeeraluni 3-5 kg hashimik eqqussinermi ukiumi ataatsimi aamma ukiup aappaata affaani pineqaatissinneqarsimasunut inissiisarfimmiititsissutigineqartarpoq. Nunattalu eqqartussisuuneqarfiata tunngavissaqartissimanngilaa aallaaviusartup tamatuma sanioqqunneqarnissaa.
Unnerluutigineqartup uppernarsaasiiffiginngilaa, Østre Landsretip ulloq 23. juni 2016-imi eqqartuussutaata suli inatsisitigut atortuutinneqannginnera. Qallunaat nunaanni pillaasarnermi inatsimmi § 191-i ilaatigut piliarineqarsimavoq piffissap misiligaaffiup iluani, tassani pineqarluni peqqarniitsumik aanngaajaarniutit pillugit pinerluuteqarneq, aammalu suliaq eqqartuussivimmut apuunneqarsimalluni piffissap misiligaaffiusup suli naannginnerani. Taamaalilluni eqqartuussisuuneqarfiup ataatsimoortillugit pineqaatissiissutigivai maannakkut pisimasut eqqartuussutigineqartut aammalu siusinnerusukkut eqqartuussummi pillagaassutissat sinneruttut, tak. Pinerluttulerinermi inatsimmi § 150, imm. 1.
Taamaalilluni pineqaatissiineq aalajangersarneqarpoq ukiuni marlunni qaammammilu ataatsimi pineqaatissinneqarsimasunut inissiisarfimmiittussanngortitsinermik.
Sinnerini eqqartuussisoqarfiup eqqartuussutaa atuuttussanngortinneqarpoq.
Inatsisinik unioqqutitsinermi eqqartuussutigineqartut qanoq ittuuneri tunngavigalugit, unnerluutigineqartup aamma nunatta eqqartuussisuuneqarfiani suliamut aningaasartuutit akilissavai, tak. Eqqartuussisarnermi inatsimmi § 480, imm. 2.
Qaasuitsup Eqqartuussisoqarfiata eqqartuussutaa ulloq 5. december 2018 atuuttussanngortinneqarpoq, kisiannili pineqaatissiissutitaajunngitsoq, taanna allanngortinneqarpoq imaalillugu ukiuni marlunni qaammammilu ataatsimi pineqaatissinneqarsimasunut inissiisarfimmiittussanngortitsinermik.
Unnerluutigineqartumut illersuisutut ivertinneqarsimasup aningaasarsiassai immikkut aalajangersaaffigineqarput. Inaarutaasumik aningaasarsiassat eqqartuunneqartumit akilerneqassapput.
Suliap normua: K 008/19
Nunatta Eqqartuussisuuneqarfiata eqqartuussissutaa
Eqqartuussiviup eqqartuussissutaa