29 apr 2021
Nunatta Eqqartuussisuuneqarfia
Inissiisarfimmiittussanngortinneqarpoq - K 019/19
Angut 62-inik ukiulik Qeqqata Eqqartuussivianit eqqartuunneqarpoq unioqqutitsisimasutut pinerluttulerinermi inatsisip §-iisa 84-ianik kannguttaattuliornermut tunngasumik. Niviarsiaraq 11-nik ukiulik nalikkaavisigut atisaasa qaavisigut attuualaarsimammagu.
Niviarsiaraq unnerluutigisamut paaqqutarisassatut inissinneqarsimavoq. Unnerluutigisaq siusinnerusukkut qaammatini pingasuni inissiisarfimmiittussatut eqqartuussaasimavoq meeqqamik 15-it inorlugit ukiulimmik kinguaassiuutitigut atoqatiginnissimasutut.
Unnerluutigisaq eqqartuussivimmi eqqartuussaavoq ataatsimoortumik pineqaatissinneqarluni inissiisarfimmut inissinneqarnermik qaammatini sisamani kiisalu pinerlisanut mitagaasimasunut taarsiissasoq.
Eqqartuussiviup eqqartuussutaa unnerluutigisamit suliareqqitassanngortinneqarsimavoq pinngitsuutitaanissani piumasaqaatigalugu.
Eqqartuussisuuneqarfiup inerniliinera
Eqqartuussiviup suliamik suliarinninnerata kingorna unnerluutigisap siusinnerusukkut eqqartuussut qaammatini pingasuni inissiisarfimmiittussanngortitsisoq naammassisimavaa. Taamaattumik eqqartuussisuuneqarfik pineqaatissiilluni eqqartuussuteqarpoq, unnerluutigisamut siusinnerusukkut eqqartuussutaasimasumik allaanerusumik. Suliap aalajangiivigineqarnera pivoq immikkut isummernertalimmik, eqqartuussisuuneqarfimmi eqqartuussisut marluk unnerluutigisaq unnerluussut malillugu pisuusutut isigigamikku. Eqqartuussisoq ataaseq isumaqarpoq unnerluussut uppernarsineqanngitsoq naammattumik qularnaassusilimmik.
Amerlanerussuteqartut taasinerat malillugu eqqartuussuteqarpoq unnerluutigisarlu eqqartuunneqarpoq inissiisarfimmut inissinneqarnermik ulluni 30-ni kiisalu mitagaanermut taarsiissasoq pinerlisamut 5.000 koruuninik.
Eqqartuussisuuneqarfiup ilaatigut pingaartutut isigaa pinerlisap unnerluutigisallu ukiuisa assigiinnginnerujussuat unnerluutigisallu pinerlisaq paaqqutassatut meerarsiaralugu.
Ulloq aalajangiiffik
Nunatta Eqqartuussisuuneqarfianit eqqartuussut oqaatigineqarpoq ulloq 5. juni 2019.
Suliap normua: K 019/19
Nunatta Eqqartuussisuuneqarfiata eqqartuussutaa