29 apr 2021
Nunatta Eqqartuussisuuneqarfia
Nukkamik toqutsinermut suliami eqqartuussut - K214/19
Angut 64-inik ukuilik Qaasuitsup Eqqartuussisoqarfianit eqqartuunneqarpoq ukiuni tallimani qaammatinilu arfilinni pineqaatissinneqarsimasunut inissiisarfimmiittussanngortinneqarluni nukkani nujagaqatigisani aallaallugu toqussimaneranut. Sakissamigut aallaaneqarnermi kingunerisaanik aavernini toqutsigisimallugu. Unnerluutigineqartup nassuiaatigivaa piffissami sivisuumi nukkaminit nakuuserfigineqartarsimalluni, piffissamilu toqutsinerup pinngilaarnerani tassannga kiinnamigut annersarneqarsimalluni
Nunatta Eqqartuussisuuneqarfiata inerniliinera
Suliaq nunatta eqqartuussisuuneqarfianit suliarineqarpoq sivisussusiliilluni suliareqqitassanngortitatut.
Eqqartuussisuuneqarfik isumaqarpoq tunngavissaqanngitsoq aallaaviusartup saneqqunneqarnissaa, tassa inoqammik toqutsineq pineqaatissiissuteqarfigineqartarmat ukiuni arfinilinni pineqaatissinneqarsimasunut inissiisarfimmiittussanngortitsinermik. Paasissutissallu, tassa toqutsinnerup pinngitsiarnerani unnerluutigineqartup toqutamit annersarneqarsimanera allatut inerniliissutaasinnaanngitsoq. Nunatta eqqartuussisuuneqarfiata pingaartumik pineqaatissiissutip aalajangiiffigineqarnerani pingaartinneqarpoq, toqukkut qimaguttoq aallaaneqarnermi tununngalluni issiasimammat, aammalu aalaleriarsinnaanera qisuariarsinnaaneralu annikillingaatsiaqqallutik imigassamik aalakoornartulimmik imersimanini pissutigalugu. Nunatta eqqartuussisuuneqarfiani eqqartuussisooqaataasoq ataaseq allatut isumaqarpoq oqarlunilu, eqqartuussisoqarfiup eqqartuussutaa atuuttussanngortinneqartariaqaraluartoq, isiginiarlugit paasissutissat, tassa toqukkut qimaguttup nakuusertarsimanera aamma unnerluutigineqartup tungaanut pissusilersortarsimanera, aammalu, unnerluutigineqartup nammineq nassuiaatigimmagu nukkani qunugalugu aammalu qanoq ilioriaasissaqartarsimanani saassunneqartarnerminut.
Ulloq aalajangiiffik
Nunatta Eqqartuussisuuneqarfianit eqqartuussut nalunaarutigineqarpoq ulloq 6 januar 2020-imi.
Suliap normua. K 214/19
Nunatta Eqqartuussisuuneqarfiata eqqartuussutaa
Sermersuup eqqartuussiviata eqqartuussutaa