Ernuttamik qulinik ukiulimmik nakuuserluni siorasaaralunilu pinngitsaaliinermi - K258/19

Qaasuitsup Eqqartuussisoqarfiata angut 54-inik ukiulik eqqartuuppaa immikkut isumagisassanngortillugu nuliami ernutaa qulinik ukiulik minnerpaamik 15-riarlugu pinngitsaalisimaneranut.

Nunatta Eqqartuussisuuneqarfiata inerniliinera

Nunatta Eqqartuussisuuneqarfianit suliaq suliarineqarpoq taamaallaat sivisussusiliilluni suliareqqitassanngortitatut. Nunatta Eqqartuussisuuneqarfiata pineqaatissiissutissamik aalajangiiniarnermi pingaartippaa pinerluutigineqartup peqqarniissusia, tassani pineqarmat 15-riarluni pinngitsaaliineq kiisalu arlaleriarluni pinngitsaaleeriaraluarneq. Taamatullu aamma eqqartuussisuuneqarfimmit pingaartinneqarpoq, kanngunarsaarinerit pisarsimammata niviarsiaqqap unnerluutigineqartumit paaqqutarineqarnerata nalaani. Isiginiarneqarput paasissutissat eqqartuunneqartup inuttut qanoq inneranut tunngasut, tassunga ilanngullugit siusinnerusukkut assingusumik pinerluuteqarnikuunera, kiisalu misiginneqataasinnaassuseqannginnera, imminut eqqarsaatigisinnaannginnera, peqqissimisinnaannginnera aamma imminut pisuutissinnaannginnera, tassami pineqaatissinneqarsimasunut inissiisarfimmiitinneqarnera naleqqutumik tunngaviliisutut nalilerneqanngimmat pinaveersaartitsissutissatut atorneqarsinnaaneranut atatillugu. Taamaattumik eqqartuussisoqarfiup eqqartuussutaa immikkut isumagisassanngortitsineq nunatta eqqartuussisuuneqarfianit atuuttussanngortinneqarpoq. Suliami pinerlineqartoq mitagaaneranut ajunngitsorsiassalerneqarpoq 125.000 kr.-inik isiginiarneqarlutik kanngunarsaasarnerisa amerlassusii kiisalu tamatut iluarfiginninnerup sivisussusia kiisalu pinerlineqartup ukiukitsuunera.