Pineqaatissiissut katsorsarneqarnermut atorunnaarsinneqartoq - K 148/20

Eqqartuussissut Nunatta Eqqartuussisuuneqarfianit oqaatigineqarpoq ulloq 7. oktober 2020.

Eqqartuussaq Ilulissat Eqqartuussiviata eqqartuussutaani 17. januaari 2001-imeersumi eqqartuunneqarpoq Danmarkimi tarnimikkut nappaatillit napparsimmavissuani piffissami killiligaanngitsumi katsorsagassatut imaluunniit tassanngaanniit nakkutigisaalluni, taamaalilluni nakorsaq katsorsaasuusoq Dronning Ingridip Napparsimmavissuani tarniluttunut immikkoortortaqarfimmi nakorsaaneq aamma Kalaallit Nunaanni Pinerluttunik Isumaginnittoqarfik erseqqarinnerusumik isumaqatigiissuteqarfigalugit aalajangiisinnaallutik Dronning Ingridip Napparsimmavissuani tarniluttunut immikkoortortaqarfik aqqusaarlugu angerlartitaassasoq, kiisalu angerlartitaanerani Pinerluttunik Isumaginnittoqarfimmit nakkutigisaassasoq, taakkulu nakorsaq katsorsaasuusoq siunersiorlugu piginnaatitaassasut napparsimmavissuarmut unitsitseqqiinissamut aalajangernissamik. Pineqaatissiissut Nuup Eqqartuussiviata eqqartuussutaani 5. maaji 2004-mi siullerpaamik atortuutiinnarneqarpoq.

Nuup Eqqartuussiviata eqqartuussut atortuutiinnarpaa eqqartuussutikkut 1. juuni 2006-imi. Eqqartuussisuuneqarfiup inerniliineq imatut paasivaa, siusinnerusukkut eqqartuussummi pineqaatissiissutaasoq naammattutut isigineqartoq, pinerluttulerinermi inatsisip §-iisa 160-iani, oqaaseqatigiit siulliit, toqqammavigalugit, taamaalillunilu ataatsimoorussamik pineqaatissiissutaanngitsoq. Nuup Eqqartuussiviata eqqartuussutaani 22. septembari 2009-mi eqqartuussut 1. juuni 2006-imeersoq atortuutiinnarneqarpoq, taamatullu aamma pisoqarpoq Sermersuup Eqqartuussiviata eqqartuussutaani 1. februaari 2013-imi.

Sermersuup Eqqatuussiviata aalajangiinerani 29. juuni 2016-imi pineqaatissiissut 17.januaari 2001-imeersoq atortussaatinneqarpoq. Eqqartuussiviup aalajangiinera ulloq 31. aggusti 2016 Nunatta Eqqartuussisuuneqarfianit atortussaatinneqarpoq.

Pineqaatissiissut 17. januaari 2001-imeersoq eqqartuussiviup aalajangiinerani 6. aggusti 2020 sioqqullugu atorunnaarsinneqarsimanngimmat, toqqammaviusariaqarpoq, pineqaatissiissut tassaasoq suliami matumani aalajangiivigineqartussaq. Taamatuttaaq pineqaatissiissut taannaavoq, eqqartuussiviup 6. aggusti 2020-imi aalajangiinerani sammineqarsimasoq.

Eqqartuussiviup toqqammavigisatut allassimasai eqqartuussisuuneqarfiup akuerai pineqaatissiissut pisimasutut atorunnaarsinneqartoq. Pissuserlu, eqqartuussap suli pisariaqartikkaa nakorsaatinik katsorsarneqarnissaq tapersersorneqarnissarlu, allaanerusumik inerniliivigineqarsinnaanngillat, katsorsaaneq peqqissaaviit iluanni ingerlatiinnarneqarsinnaammat. Allanik pasinaataasinnaasunik soqanngimmat, pinerluuteqaqqissinnaanermut ulorianaammik, pisariaqartinneqanngilaq pineqaatissiissutip atortuutiinnarneqarnissaa.

Tamanna tunngavigalugu eqqartuussiviup aalajangiinera atortussanngortinneqarpoq.

Eqqartuussisarnermi inatsisip §-iisa 480-iani, imm. 1, naapertorlugu suliamut aningaasartuutit naalagaaffiup aningaaseriviata akilissavai.

Suliap normua: K 148/20

Eqqartuussissutit nassuiaatillu