Gå til sidens indhold

Nunatta Eqqartuussisuuneqarfia

13 jun 2022

Nunatta Eqqartuussisuuneqarfia

Pinngitsaaliilluni atoqatiginnissimanermik - K233/19

Angut 20-nik ukiulik niviarsiaqqamik 13-inik ukiulimmik nakuuserluni pinngitsaliilluni atoqatiginnissimanermut Eqqartuussisoqarfik Sermersuumit pinngitsuutinneqarpoq.

Unnerluutigineqartoq niviarsiaqqamik tilluisimasutut kiisalu isatsisimasutut taamaaliornermigullu niviarsiaqqamik ukiukitsumik taassuminnga utsuisigut itiatigullu atoqatiginnissimasutut unnerluutigineqarpoq. Eqqartuussisoqarfik pinngitsaaliilluni atoqatiginninnermut pinngitsuutitsivoq, tamanna naammattumik uppernarsarneqarsorineqanngimmat.

Unnerluussisussaatitaasut eqqartuussummik suliareqqitassanngortitsipput, piumasaqaatigalugu unnerluussut naapertorlugu eqqartuussuteqartoqassasoq kiisalu sukannernerulersitsisoqassasoq.

Eqqartuussisuuneqarfiup inerniliinera

Eqqartuussisoqarfiup aalajangiinera assigalugu eqqartuussisuuneqarfiup uppernarsarneqarsorinngilaa unnerluutigineqartoq niviarsiaqqamik pinngitsaaliilluni atoqatiginnissimasoq. Niviarsiaqqap nassuiaataata nakorsaniit paasissutissanit taperserneqannginnera, taamatuttaaq suliami takuneqarsinnaasunik uppernarsaateqannginnera eqqartuussisuuneqarfiup ilaatigut pingaartippai. Niviarsiaqqap qularpasilluni ataqatigiinngitsumillu nassuiaataa sanilliullugu eqqartuussisuuneqarfik pinngitsaaliilluni atoqatiginninnermut pinngitsuutitsivoq. Akerlianilli atoqatigiittoqarsimanera eqqartuussisuuneqarfiup uppernarsarneqarsoraa, kisiannili kajumissutsimik atoqatigiinneq pineqarsoraa. Niviarsiaraq taamatut pisoqarmat 13-iinnarnik ukioqarsimammat unnerluutigineqartorlu 17-inik ukioqarluni unnerluutigineqartoq pinerluttulerinermi inatsisip § 79-ianik unioqqutitsinermut pisuutinneqarpoq. Pineqaatissiissut ulluni 60-ini inissiisarfimmiittussanngortitsinermut aalajangersarneqarpoq, unnerluutigineqartup ukiui piffissarlu suliap suliarineqarneranut atorneqartoq eqqarsaatigalugit utaqqissitanngortinneqarluni ukiumi ataatsimi misiligaaffiliinertalimmik. Aammattaaq eqqartuussisuuneqarfiup niviarsiaraq mitagaanermut taarsiissutinik kr. 15.000-inik taarsiivigineqartussanngortippaa.

Ulloq aalajangiiffiusoq

Eqqartuussut Nunatta Eqqartuussisuuneqarfianit oqaatigineqarpoq ulloq 9. juni 2020

Suliap normua: K 233/19

Nunatta Eqqartuussisuuneqarfiata eqqartuussutaa

Sermersuup eqqartuussiviata eqqartuussutaa

Nassuiat