Nakuuserneq - K 194/21

Eqqartuussissut Nunatta Eqqartuussisuuneqarfianit oqaatigineqarpoq ulloq 5. November 2021.

Suliami ilisimannittunit aamma unnerluutigineqartumit nassuiaasoqareerneratigut, nunatta eqqartuussisuuneqarfiata tunngavigivaa, unnerluutigineqartoq inissiamut pineqartumut takkussimasoq ilisimannittut marluk ilagalugit. Suliami ilisimannittut sinneri inissiami inimiissimapput takusaqarsinnaanatik inissiap isaariaani matup eqqaani susoqarnersoq. Unnerluutigineqartup, ilisimannittut marluk nassuiaareernerisigut, ikorfartorneqartunit assinit uppernarsaasiissutinik aamma nakorsap paasissutissiissutaanit, nunatta eqqartuussisuuneqarfiata uppernarsineqartutut isumaqarfigivaa, unnerluutigineqartup inissiamut matu ima sakkortutigisumik ajassimagaa, arnaq matumit ikkamut uppitinneqartillugu.

Nunatta eqqartuussisuuneqarfia isumaqarpoq, unnerluutigineqartup takusinnaasimassagaa ilimagisinnaassimassallugu matup taama sakkortutigisumik ajanneratigut arnaq ajoqusersinnaassasoq, taamaattumik nunatta eqqartuussisuuneqarfiata unnerluutigineqartoq pisuutippaa unnerluussutip ilaanut, pineqartumut, unnerluutigineqartup arnamik iikkamut ajatsineranut.

Nassuiaasoqareerneratigut nunatta eqqartuussisuuneqarfiata tunngavigivaa perulluliortoqalersimasoq, arnaq iikkamut ajanneqareernermi kingornatigut nikuimmat, arnap aamma unnerluutigineqartup perulluliornerminni imminnut nujaartuussimallutik. Ilisimannittut assigiinngitsunik nassuiaateqarput, pisimasup nalaani arnaq imaluunniit unnerluutigineqartoq iliuuseqarnerunersut, taamatullu aamma assigiinngitsunik nassuiaatigineqarluni qanoq unnerluutigineqartup arnaq annersarsimaneraa. Ilisimannittut arlallit nassuiaapput pisimasup aallartinnera takusinnaasimanagu, ilisimannittullu arlaannaataluunniit nassuiaatiginngilaa unnerluutigineqartup arnaq annersarsimaneraa. Taamaalilluni nunatta eqqartuussisuuneqarfia isumaqarpoq qularnaatsumik uppernarsineqanngitsoq eqqartuussutaasinnaasumik, unnerluutigineqartup unioqqutissimaneraa pinerluttulerinermi inatsimmi nakuusernermut aalajangersagaq arnap annersarneranut imaluunniit nujaartorneranut, taamaattumillu unnerluussutip taannartaanut pinngitsuutinneqarluni.

Nakuusersimanerup pissusianut aamma isiginiarneqarluni piffissaq suliap suliarineqarneranut atorneqarsimasoq sanilliunneqarlutik unnerluutigineqartup inuttut atugarisai pitsaasuusut, pineqaatissiissut aalajangersarneqarpoq utaqqisitamik ulluni 30-ni pineqaatissinneqarsimasunut inissiisarfimmiittussanngortinneqarmik ukiumik ataatsimik misligaaffilikkamik, tak. Pinerluttulerinermi inatsimmi § 129, imm. 2.

Suliap normua: K 194/21

Eqqartuussissutit nassuiaatillu