Akunnerit 60-it inuiaqatigiinni sulisitaanermik eqqartuunneqarpoq K 144/21

Eqqartuussissut Nunatta Eqqartuussisuuneqarfianit oqaatigineqarpoq ulloq 7. December 2021. 

Unnerluutigineqartoq pisuunerarpoq angut pineqartoq arlaleriarlugu kiinaatigut assamminik eqissimasumik aamma siaarsumik annersarsimallugu. Angut nassuiaavoq, assammik eqissimasumik arfinileriarluni annersarneqarsimalluni. Nassuiaatigisaalu ikorfartuiffigineqarluni ilisimannittup nassuiaaneratigut, tassa angut issiavissuarmi issialluni talini illuttut atorlugit unnerluutigineqartup annersaaneri assersorsimagai, aamma ilisimannittup nassuiaatigivaa, unnerluutigineqartup angut arlaleriarlugu tilluarsimagaa.

Taamaattumik nunatta eqqartuussisuuneqarfianit uppernarsineqarpoq unnerluutigineqartup angut arlaleriarlugu kiinaatigut tilluarsimagaa.

Angutip tilluartinnerit saniatigut aamma puujaasamik anaaneqarsimanini nalunaarutigisimavaa. Angut nassuiaavoq puujaasaq takusimanagu. Aamma ilisimannittut marluk puujaasamik kasutsinermik takusaqanngillat, aamma unnerluutigineqartup tamanna pisuunnginnerarfigivaa, tassa angut puujaasamik anaasimanera.

Tamanna tunngavigalugu nunatta eqqartuussisuuneqarfianit uppernarsineqanngilaq unneluutigineqartup angut aamma puujaasamik anaasimagaa, unnerluussutillu taannartaanut pinngitsuutinneqarluni.

Pineqaatissiissut aalajangersarneqarpoq nalunaaquttap akunneri 60-it inuiaqatigiinni sulisitaanermik tamannalu naammassineqassaaq sivisunerpaaffiliussap qaammatit arfinillit iluanni aamma ukiumi ataatsimi nakkutigineqassaaq, tak. pinerluttulerinermi inatsimmi § 140, tak. § 88 aamma § 141, imm. 1 aamma 2.

Nunatta eqqartuussisuuneqarfiata pineqaatissiissumik toqqaanermi unnerluutigineqartoq siusinnerusukkut eqqartuussuteqarfigineqarnikuunngimmat pineqaatissiissummik aamma inuttut atugarissaartuunera pingaartinneqarpaat.

Suliap normua: K 144/21

Eqqartuussissutit nassuiaatillu