Gå til sidens indhold

Nunatta Eqqartuussisuuneqarfia

28 dec 2021

Nunatta Eqqartuussisuuneqarfia

Kannguttaatsuliorneq - K 003/21

Nunatta Eqqartuussisuuneqarfiata ulloq 8. februar 2021 angut 48-nik ukiulik kannguttaatsuliorsimasutut pisuutippaa.

Eqqartuussissut Nunatta Eqqartuussisuuneqarfianit oqaatigineqarpoq ulloq 8. februar 2021.

Unnerluussaq eqqartuussisoqarfiup ulloq 14. september 2019 eqqartuuppaa arnaq pineqartoq kannguttaatsuliorfigineranut tuiisigut, nulusuigut uppataasigullu attuuaannissimanermut. Attuuanninnerit pisimapput arnap atisaasa qaavisigut, unnerluussaasup assaank peersitsinissaata tungaanut. Kannguttaatsuliorfiginninneq pisimalluni arnap najugaqatigiiffimmi Akitterni Tasiliisami najugaqartillugu, tassani unnerluussaq atorfeqartitaatillugu. Unnerluussaasoq nassuiaanermini najugaqatigiiffik nassuiaatigivaa inuit immikkut pisariartitsisut najugaqarfigigaat.

Eqqartuussisuuneqarfik isumaqarpoq pineqaatissiineq aalajangersarneqartariaqartoq utaqqisitaanngitsumik ulluni 30-ni pineqaatissinneqarsimasunut inissiisarfimmiittussanngortitsinermik.

Pingaartumik nunatta eqqartuussisuuneqarfianit pingaartinneqarpoq arnamik kannguttaatsuliorfiginninneq pisimammat unnerluussaasoq angerlarsimaffimmi atorfeqartillugu, taassuma najugaqarfigisaani, taamaattumik immikkut ilungersunaateqarluni tatiginninnermik pakatsisitsineq, naak attuuanninnerit peqqarniippallanngitsutut isikkoqaraluartut. Pissutsit taamaannerisigut eqqartuussisuuneqarfik isumaqarpoq pineqaatissiissut, naak unnerluutigineqartoq nuttut atugarissaartuugaluartoq utaqqisitanngortinneqartariaqanngitsoq.

Unnerluussap siusinnerusukkut pineqaatissinneqarsimannginnera inuttut atugarisaanut pitsaasuusunut ilaatinneqarpoq. Tamannalu siusinnerusukkut pineqaatissinneqarsimannginnera sakkukillisaataasinnaanngilaq.

Mitagaanermut ajunngitsorsiassaq eqqartuussisoqarfiup arnaq pineqartoq pisassanngortissimasaa suliani taamaattuni nalinginnaasumik periusiuvoq, taamaattumilu eqqartuussisoqarfiup mitagaanermut ajunngitsorsiassanik aalajangigaa atuuttussanngortinneqarluni.

Unnerluussaq eqqartuunneqarpoq ulluni 30-ni pineqaatissinneqarsimasunut inissiisarfimmiittussanngortinneqarluni.

Eqqartuussisoqarfiup mitagaanermut ajunngitsorsiassatut aalajangigaa atuuttussanngortinneqarpoq.

 

Suliap normua: K 003/21

Eqqartuussissutit nassuiaatillu