Gå til sidens indhold

Nunatta Eqqartuussisuuneqarfia

28 dec 2021

Nunatta Eqqartuussisuuneqarfia

Pinngitsaaliineq nakuusernissamik siorasaarinertalik - K 249/20

Eqqartuussisoqarfiup eqqartuussutaa imatut allanngortinneqarpoq, unnerluussaq pisuutinneqarluni pinngitsaaliinermut ataatsimut toqqaannartumik nakuusernissamik siorasaarinertalimmik.

Eqqartuussissut Nunatta Eqqartuussisuuneqarfianit oqaatigineqarpoq ulloq 5. februar 2021.

Aallaqqaasiullugu oqaatigineqassaaq, suliami paasissutissat malillugit tunngavigineqarmat piffissaq pinerliiffik piffissami majimiit julimut 2013-imi pisimammat, illuatungeriit ernerat marts 2013-imi inunngorsimammat, pisimasullu pisimallutik nukappiaraq marlunnik aamma sisamanik qaammateqartoq.

Uppernarsaasiisoqareerneratigut eqqartuussisuuneqarfimmit uppernarsineqarpoq, unnerluutigineqartup ataasiarluni siorasaaraluni nakuusernertalimmik nuliakuni, pinngitsaalillugu atoqatigisimagaa. Eqqartuussisuuneqarfimmit pingaartinneqarpoq arnaq qularnaalluinnartumik ataqatigiissumillu nassuiaateqarmat, tassunga ilanngullugu nassuiaateqarluni, qanoq unnerluutigineqartup nammineq qasunini pissutigalugu itigartitsigaluarluni, qallerluni innarfigisimagaani assani eqillugit annersarniarluni siorasaarluni, nakuuserfigineqarnissaminillu annilaanganini pissutigalugu atoqatigitissimalluni. Tamatumani eqqartuussisuunnernit uppernarsineqarpoq unnerluutigineqartup nuliakuni pinngitsaalillugu atoqatigisimagaa nakuuserfiginissaanik siorasaarlugu, pisuutinneqarporlu pinngitsaaliinermut pinerluttulerinermi inatsimmi § 77, imm. 1, nr. 1 tunngavigalugu.

Kisiannili eqqartuussisut isumaqanngillat unnerluutigineqartoq pisimasuni tulliuttuni marlunni pisuusoq pinngitsaaliinermut unnerluussisussaatitaasunit oqaatigineqartutut. Pissutsillu imaannerat, tassa unnerluutigineqartup nuliakuni siorasaarsimagaa assani eqillugu atoqatiginninnissaq anguniarlugu, aammalu kiinnami isikkuatigut takutitsinera kamanerminik, tamanna arnap nassuiaatigivaa ersigisimallugu, namminermi naammanngilaq nakuusernissamik siorasaarinertut takutitsiniarsimanertut.

Arnaq nassuiaavoq, pisimasuni taakkunani pingasuni unnerluutigineqartoq siorasaarutitut nipeqarsinnaasumik paasineqarsinnaasutut oqaaseqarsimanngitsoq. Nassuiaaneralu naapertorlugu suliami taaneqartut atoqatigineqarsimanerit ukiut arlallit sioqqullugit nakuuserfigineqarsimanerata saniatigut, oqaatigineqarpoq nakuusersimaneq alla, taamaattumik uppernarsineqartutut isigineqanngilaq, unnerluutigineqartup nuliakuni pinngitsaaliilluni atoqatiginnissaq siunertaralugu nakuusernissamik sioranartuliorsimanera. Taamaattumik unnerluutigineqartoq unnerluussutigineqartup taannartaanut pinngitsuutinneqarpoq.

Qulaani oqaatigineqartut arnap nassuiaatai tunngavigalugit uppernarsineqartutut isumaqarfigineqarpoq, unnerluutigineqartoq pisuusoq pinngitsaaliinermi ataatsimi. Pisimasullu aatsaat januar 2020-mi nalunaarutigineqarsimanera allatut inerniliissutaasinnaanngilaq. Tassunga atatillugu oqaatigineqassaaq, arnap aatsaat psykologimik oqaloqatiginninnerminut atatillugu paasilersimammagu 2013-mi tamakkiisumik kinguaassiutitigut pinngitsaalineqarsimalluni, tamannalumi pissutaavoq kingusinnerusukkut nalunaarutiginninneranut.

Unnerluutigineqartup piumasaqaatini sulleq pisinnaanngippat tulliullugu piumasaqaateqarpoq, suliaq nutaamik eqqartuussisoqarfimmi suliareqqinnissaanut utertinneqassasoq, eqqartuussisooqataasut katiterneri pissutigalugit. Unnerluutigineqartullu tamatumunnga tapersiutitut atuuttussanngortippaa, eqqartuussisooqataasut marluk ilisimannittup apersorneqarnerani qullipissimaneri.

Paasissutissat naapertorlugit tunngavissaqanngilaq isumaqassalluni eqqartuussisoqarfimmi eqqartuussisooqataasut piumasaqaatigineqartunik suliap kimulluunniit kalluusimanani aalajangersaaffiginissaanut naammassinnissimanngitsutut isumaqarfigissallugit, taamaattumik nunatta eqqartuussisuuneqarfia tunngavissarsisimanngilaq suliap siullermeeriffiusumut utertinneqarnissaanut. Paasissutissat, tassa eqqartuussisooqataasut marluk suliap pingaarnertut isumaqatiginninniutigineqarnerani attortissimasimaneri namminermi allatut inerniliissutaasinnaanngilaq.

Eqqartuussisoqarfiup pineqaatissiissummik aalajangersaasimanera atuuttussanngortinneqarpoq, tassami unnerluutigineqartoq siullermeeriffiusumiit piumasaqaatigineqartumit sakkortunerusumik akulerunnertalimmik pineqaatissinneqarsinnaanngimmat. Taanna kisimi suliareqqitassanngortitsisuummat, tak. Eqqartuussisarnermi inatsimmi § 550.

Unnerluussisussaatitaasut arnaq sinnerlugu piumasaqaateqarput mitagaanermut ajunngitsorsiassamik 60.000 kr.-it ataannagit.

Isiginiarneqarpoq tamakkiisumik kinguaassititigut pinngitsaaliinerunera aamma ajunngitsorsiassat annertussusiat naapertuuttutut isigineqarmat eqqartuussisoqarfiup tamatumani eqqartuussutaa atuuttussanngortinneqarpoq.

Eqqartuussisoqarfiup eqqartuussutaa imatut allanngortinneqarpoq, unnerluutigineqartup pisuutinneqarluni pinngitsaaliinermut ataatsimut toqqaannartumik nakuusernissamik siorasaarinertalimmik.

Sinnerini eqqartuussisoqarfiup eqqartuussutaa atuuttussanngortinneqarpoq.

 

Suliap normua: K 249/20

Eqqartuussissutit nassuiaatillu