Gå til sidens indhold

Nunatta Eqqartuussisuuneqarfia

10 jan 2022

Nunatta Eqqartuussisuuneqarfia

Ukiuni 5-ni pineqaa. inissiisarfimmiittussanngortinneqarluni - K 249/21

Arnaq 25-nik ukiulik Sermersuup eqqartuussivianit qaammatini pingasuni pineqaatissinneqarsimasunut inissiisarfimmiittussanngorlugu eqqartuunneqarpoq, nakuuserneq, siorasaarineq, tillinniarneq kiisalu toqutseriarsimanini pillugit.

Eqqartuussissut Nunatta Eqqartuussisuuneqarfianit oqaatigineqarpoq ulloq 10. januar 2022.

Unnerluutigineqartoq eqqartuussisoqarfimmit eqqartuunneqarpoq 1) nakuusernermut 16. maj 2020 inuk alla ilagalugu arnaq pineqartoq nunamut uppiteriarlugu isimmigarsimallugu aamma niaquatigut timaatigullu annersarsimallugu, taamaalilluni arnaq annertuumik ajoquserneqalersillugu, 2) inuunermik siorasaarineq igaffiup savia atorlugu ulloq 23. juni 2020 aamma 3) ikuallatsitsineq ulloq 1. august 2020 najukkami Tasiilamiittup sinittarfiani oqorutinik kukutsinermigut kingornalu illu qimassimallugu, taamaalilluni illu tamakkernagu ikuallatsisimallugu. Pisimasuni taakkunani pisuunermik apeqqut nunatta eqqartuussisuuneqarfianut suliareqqitassanngortinneqarsimanatik.

Nunatta eqqartuussisuuneqarfia isumaqarpoq nassuiaasoqareerneratigut aamma ikuallatsitsinermi pissutsinik uppernarsaasiisoqareerneratigut, tamannalu unnerluutigineqartup eqqartuussisoqarfimmi eqqartuussaassutigivaa, uppernarsineqartutut isigineqartariaqartoq unnerluutigineqartoq pisuusoq inoqammik toqutseriarnermi. Taamaalilluni eqqartuussisuuneqarfiup uppernarsivaa unnerluutigineqartup paasisimassagaa annertuumik ilimanaateqarnera sakkortuumik ikuallattoqalernissaa siniffimmi oqorutit kukukkamigit, taamatullu aamma paasisimassagaa annertuumik ilimanaateqarnera ikuallannerup annertusinissaa taamaalillunilu inummut illup iluaniittumut ulorianarsissalluni. Tamanna ikorfartuiffigineqarpoq ilaatigut unnerluutigineqartup nassuiaaneratigut, inneq ima siaaruaassimatigisoq illumiit anigami, allaat nammineq qamissinnaanangu, aamma ikuallannerup misissuiffigineqarnerani annertussusiata allaaserineqarnera naapertorlugu. Taamatullu aamma ilimanarluinnartutut isigineqartariaqarluni pineqartup illumiinnera, nammineq nassuiaanera malillugu kromiit anigamilli taanna ilagisimanerarlugu. Taamaattumik unnerluutigineqartup nassuiaanera malillugu qanoq iliuuseqanngimmat pineqartup illumiit ikuallattumit anisinnissaanut, nunatta eqqartuussisuuneqarfiata uppernarsineqartutut isumaqarfigivaa, unnerluutigineqartoq pisuusoq pineqartumut toqutseriarnermut, suliami pisimasoq 6-mi allaaserineqartut. Nunatta eqqartuussisuuneqarfia isumaqarpoq naammattumik qularnaatsumik uppernarsineqanngitsoq, unnerluutigineqartup ilisimasimagaa angutip illup iluaniissinnaanera, taamaattumik angummik toqutseriarnermut pinngitsuutinneqarpoq.

Ataatsimut nalilersuereernermi pineqaatissiineq nalilerneqarpoq ukiuni tallimani pineqaatissinneqarsimasunut inissiisarfimmiittussanngortitsnermik. Nunatta eqqartuussisuuneqarfianit pingaartumik pingaartippaat, unnerluutigineqartoq eqqartuunneqarsimammat peqqarniitsorujussuarnut arlalinnut pinerluttulerinermi inatsimmik unioqqutitsinernut, tassani inoqammik toqutseriarneq aallaavittut pineqaatissiissutigineqartarpoq ukiuni pingasuni pineqaatissinneqarsimasunut inissiisarfimmiittussanngortinneqarnermik, aamma ikuallatsitsineq taamatut pissusilik unnerluutigineqartup eqqartuussaassutigisaa aamma aallaavittut ukioq ataaseq sinnerlugu pineqaatissinneqarsimasunut inissiisarfimmiitussanngortinnermik pineqaatissiissutaasarluni.

Unnerluutigineqartoq eqqartuunneqarpoq ukiuni tallimani pineqaatissinneqarsimasunut inissiisarfimmiittussanngortinneqarluni.

 

Sulipa normua: K 249/21

Eqqartuussissutit nassuiaatillu