Gå til sidens indhold

Nunatta Eqqartuussisuuneqarfia

01 jun 2022

Nunatta Eqqartuussisuuneqarfia

Kinguaassiutitigut meeqqanut atornerluineq - K 050/22

Massakkut 25-nik ukiulik eqqartuussivimmi eqqartuunneqarpoq, meeqqanik tunngasunik pornografinik tigumiaqarnerminut, nammineq immiussanik assinillu assigiinngitsunik peqqarniitsunik imalinnik tigummiaqarnerminut.

Eqqartuussissut Nunatta Eqqartuussisuuneqarfianit oqaatigineqarpoq ulloq 1. juni 2022.

Unnerluutigineqartoq eqqartuussisoqarfimmit eqqartuunneqarpoq meeqqanik tunngasunik pornografinik tigumiaqarnermut assit 376-it kategori 1-t, assit 655-t kategori 2-mut ilaatinneqartut assit 59-it kategori 3-mut ilaatinneqartut aamma filmit 51-t kategori 2-mut ilaatinneqartut aamma filmit 16-t kategori 3-mut ilaatinneqartut. Taakkua saniatigut tigumiaqarluni filmilianik immikkuullarissunik 4-nik nammineerluni immiussaminik. Taakkua filmiliat kategori 2-jullutik. Taamatullu aamma eqqartuunneqarnikuuvoq kannguttaatsuliorfiginninnermut ullormi 10.-ni aamma 11. juli 2020 niviarsiaraq 13-nik ukiulik arlaleriarlugu qarngatigut kunissimallugu, aamma arlaleriarlugu iviangiisigut utsuisigullu atisaata qaavisigut attualaartarsimallugu. Pisimasuni taakkunani pisuunermik apeqqut nunatta eqqartuusssuuneqarfianut suliareqqitassanngortinneqarsimanngillat.

Suliap pisimasuini 1-mi aamma 5-mi unnerluutigineqartup nassuerutigivaa unnerluussissummi oqaatigineqartutut iliuuseqarsimalluni, pissutsillu piviusut nassiuiaateqarfiginerusimallugit. Nunatta eqqartuussisuuneqarfiani suliami pisimasuni 1-mi aamma 5-mi uppernarsaasiinermi naliliinermi pingaartumik pineqarsimavoq iliuuserineqartut ilai unnerluussissummi allaaserineqartut pineqaatissiissuteqarfigineqassanersut pinerluttulerinermi inatsimmi § 77, imm. 1, nr. 3 tunngavigalugu pinngitsaaliinertut meeqqamik 12-it inorlugit ukiulimmik allatut atoqateqarnertut, imaluunniit pineqaatissiissuteqarfigineqassanersut kannguttaatsuliorfiginnissimasutut.

Unnerluutigineqartup nassuiaateqareerneratigut aamma nunatta eqqartuussisuuneqarfianut filmiliat takutinneqareerneratigut eqqartuussisuuneqarfiup uppernarsarneqartutut isumaqarfigivaa, unnerluutigineqartoq qularutaanngitsumik sisamariarluni niviarsiaraq iliuuseqartissimagaa piffissami sivisuumi minutsini arlaqartuni usuni tissassartillugu inernissami tungaanut. Sivisussusia isiginiarneqarluni, sakkortussusia aamma niviarsiaqqamik peqataalersitsinera, taassuma ersarissumik nalorpasinngilaa sulerinerluni aamma atoqateqarnermi iliuserineqartoq nalunagulu unnerluutigineqartup kissaatigisaa suunersoq pisumi qanoq iliornissamini, nunatta eqqartuussisuuneqarfianit uppernarsineqarpoq, pineqartoq tassaasoq kinguaassiutitigut atornerluineq atoqatigiinnermut qanittumik pissuseqartoq, taamaattumillu pisimasup taakkortai pineqaatissiissutitaqassasut pinngitsaaliinertut kujanninnerunngitsumik allatut kinguaassiutitigut atoqatiginninnertut. Taamaalilluni, aamma eqqartuussisoqarfiup eqqartuussutaa imatut paasineqartariaqarmat, kinguaassiutitigut atornerluinerit sinneri, suliami pisimasoq 1-mi oqaatigineqartut pineqaatissiissuteqarfigineqarsimapput kannguttaatsuliorfiginninnertut, eqqartuussisoqarfiullu pisuunermik naliliinera suliami pisimasoq 1-mi atuuttussanngortinneqarpoq.

Suliami pisimasoq 5-mi ersersinneqarpoq nunatta eqqartuussisuuneqarfianut filmiliami takutitami, unnerluutigineqartup niviarsiaraq alla piffissami minutsit 20-inik sivisussusilimmi timaatigut assigiinngitsutigut arlatsigut attualaaraa, taanna siniffimmi pallorluni sinittutut isikkoqartoq. Niviarsiaqqap atorpai leggins-it taakkua saniatigut qarliit attariit jerseymik annoraaminertallit naatsunik niutallit siffiaata tungaanut assiisut. Unnerluutigineqartup attualaarinninneri tamarmik atisaata qaavisigut pipput, sivkitsumillu assani atorlugit inussani niviarsiaqqap naatsuinut aamma leggins-iinut pulatittarlugit. Taamaakkaluartoq pineqartoq tassaalluni tagiartuinertut isikkulimmik iliuuseqarneq, ilaatigut tamanna pilluni kinguaassiutaatigut sivisuumik sivisussusilimmik, eqqartuussisuuneqarfik isumaqarpoq pisimasoq taanna pineqaatissiissutitaqassasoq kannguttaatsuliorfiginninnertut, pingaartumik niviarsiaqqamik attualaarinninneq, taanna pisimasup pinerata nalaani tamakkiisumik atisaqarpoq, atisaasalu iluisigut pilluni.

Pinerluutip pissusilersuutitaa unnerluutigineqartup eqqartuussaassutigisaa sanilliunneqarluni paasissutissat inuttaanut tunngasut, tassunga ilanngullugu pingaartumik ulorianassusianik nalornineq, nakorsat eqqartuussinermi siunersiortagaasartut oqaatigisaat oqaaseqaatiminni 21. juli 2021-mik ullulikkami, eqqartuussisuuneqarfik isumaqarpoq naammattumik tunngavissaqanngitsoq isumaqassalluni unnerluutigineqartoq inuup inuuneranik peqqissusaanik aamma kiffaanngissusianik ulorianartorsiortitsisinnaasoq, taamaalilluni tunngavissaqarani immikkut isumagisassanngortitsinermik eqqartuussinissamik.

Eqqartuussisarnermi periuutsip malitsigisai, meeqqanik 12-it inorlugit ukiulinnik kinguaassiutitigut atornerluinerup taamatut peqqarniissusillip unnerluutigineqartup eqqartuussaassutigisaa suliami matumani pineqaatissiissutitaqartarput ukiuni arlalinni pineqaatissinneqarsimasunut inissiisarfimmiittussanngortinneqarnermik. Taamatullu aamma pineqaatissiisoqartarluni meeqqanut tunngasunik pornografinik taamatut annertutigisunik tigumiaqarnermi, unnerluutigineqartup tigumiaqarnermi pisuutitaaffigisaani piffissami sivisunerusumi pineqaatissinneqarsimasunut inissiisarfimmiittussanngortitsissutaasarluni.

Nunatta eqqartuussisuuneqarfiata ataatsimut suliap peqqarniissusianik nalilersuereerneratigut eqqartuussisuuneqarfik isumaqarpoq suliami matumani ukiuni sisamani pineqaatissinneqarsimasunut inissiisarfimmiittussanngortinnermik aalajangersaasoqassasoq.

Nunatta eqqartuussisuuneqarfianit pingaartumik pingaartinneqarpoq, pineqartoq tassaammat peqqarniitsumik kinguaassiutitigut atornerluineq meeqqanut arlalinnut, aamma suliami pisimasoq 1-mi atornerluinerit piffissami sivisunerusumi pisimallutik. Taamatullu aamma eqqartuussisuuneqarfiup pingaartippaat niviarsiaqqat ukiui, unnerluutigineqartullu tatigeqatigiinneq peqqarniitsumik atornerlussimavaa, unnerluutigineqartullu aamma meeqqat peqaataalersinneqarsimasut akornanni, tassunga ilanngullugu pingaartumik nammineq soraluaata niviarsiaqqap akunnerminni tatigeqatigiinnerat, taanna unnerluutigineqartup angerlarsimaffiani peroriartorsimavoq. Taamatullu aamma eqqartuussisuuneqarfiup pingaartippaa, meeqqanik atornerluineq arlalitsigut suli ajornerulersinneqarsimammat, unnerluutigineqartup atornerluinernik filmiliorneratigut. Taamatullu aamma eqqartuussisuuneqarfiup pingaartippaa politikkikkut suliani pineqaatissiisarnerup sakkortusaaffigineqarnissaanik kissaateqarneq, meeqqanik kinguaassiuutitigut atornerluinerit pineqarneranni.

Eqqartuussisoqarfiup arsaarinninnissami aamma mitagaanermi ajunngitsorsiassaliinermi eqqartuussutaa atuuttussanngortinneqarpoq eqqartuussisoqarfiup tunngavilersuutigisai tunngavigalugit imatut allannguuserlugu, niviarsiaqqap mitagaanerani ajunngitsorsiassaq aalajangersarneqarpoq 20.000 kr.-inut. Niviarsiaqqap mitagaanerani ajunngitsorsiassamik aalajangersaanermi eqqartuussisuuneqarfiup pingaartumik pingaartissimavaa, kannguttaatsuliorfiginninneq pisimammat piffissami sivisunerusumi, taasuma angaanit piliarineqartoq, taannalu taassuma peroriartoqatigisimallugu.

Unnerluutigineqartoq eqqartuunneqarpoq ukiuni sisamani pineqaatissinneqarsimasunut inissiisarfimmiittussanngortinneqarluni.

Eqqartuussisoqarfiup eqqartuussutaa arsaarinninnissamut tunngasoq aamma mitagaanermi ajunngitsorsiassaliinissaq atuuttussanngortinneqarpoq imatut allannguuserlugu, niviarsiaqqap mitagaanerani ajunngitsorsiassaq aalajangersarneqarpoq 20.000 kr.-inut.

 

Suliap normua: K 050/22

Eqqartuussissutit nassuiaatillu