Gå til sidens indhold

Nunatta Eqqartuussisuuneqarfia

03 jun 2022

Nunatta Eqqartuussisuuneqarfia

Uluni 14-ni pineq. inissiisarfimmiittussanngortinneqarnermik - K 108/22

Arnaq 47-nik ukiulik eqqartuunneqarpoq mianersoqqussuteqarfigineqarluni, taanna meeqqat 18-nit inorluigit ukiullit pillugit pornografiimik filmiliamik siammarterisimammat Facebook-mi atuisinnaasorpassuarnut.

Eqqartuussissut Nunatta Eqqartuussisuuneqarfianit oqaatigineqarpoq ulloq 3. juni 2022.

Suliap aalajangiiffigineqarnerani tunngavigineqarsinnaavoq filmi pineqartoq kategori 2-junera, aamma unnerluutigineqartoq facebookimini 709-it ataannagit ikinnguteqarluni.

Uppernarsaaseereernermi uppernarsineqarpoq filmi unnerluutigineqartup facebookiatigut siammarterneqarsimasoq. Unnerluussissummit ersersinneqarpoq siammarterineq unnerluutigineqartup najugaaniit pisimasoq. Eqqartuussisuuneqarfik isumaqarpoq tamatumani pingaarnerunngitsoq, siammarterinermi mobildata imaluunniit internet allaneersoq unnerluutigineqartup najugaata saniatigut atorneqarsimanersoq.

Unnerluutigineqartup filmimi pineqartut pillugit oqaaseqaatit akisarsimavai nammineq facebookiminiit. Taamaattumik unnerluutigineqartup filmip imarisaa ilisimasimassavaa, nassuiaatigisaalu filmip imaanik ilisimasaqannginnerarluni facebookimi siammartikkamini tunuartinneqarpoq.

Taamaattumik unnerluutigineqartoq siunertaqarsimassaaq meeqqanut tunngasumik pornografimik siammarterinissamik, taamaattumillu unnerluussissutigineqartoq naapertorlugu pisuutinneqarluni.

Tamanna tunngavilersuutigalugu eqqartuussisoqarfiup uppernarsaasiinermi inerniliussaa atuuttussanngortinneqarpoq.

Eqqartuussisuuneqarfik aalajangersaavoq pinerluttulerinermi inatsimmi § 129, imm. 1, tak. imm. 2, tak. 85, imm. 1 naapertorlugit, pineqaatissiissummik utaqqisitamik ulluni 14-ni ukiumik ataatsimik misiligaaffilikkamik pineqaatissiinermik.

Nunatta eqqartuussisuuneqarfiata pineqaatissiissummik aalajangersaanermini pingaartippaa, pineqarmat meeqqat pillugit pornografiimik filmiliaq kategori 2, taannalu siammarterneqarsimalluni atuisinnaasorpassuarnut.

Eqqartuussisuuneqarfiup oqaatigivaa suliap qanoq ittuunerata ilungersunartuunera, suliap suliarineqarnerata pinerliinermiit eqqartuussaanissap tungaanut ukiut marluk missaanniissimanera aalajangiisumik pingaaruteqanngimmat.

Suliami aningaasartuutit naalagaaffiup karsianit akilerneqassapput, tak. eqqartuussisarnermi inatsimmi § 480, imm. 1.

Eqqartuussisoqarfiup eqqartuussutaa allanngortinneqarpoq imaalillugu, pineqaatissiissut qaffanneqarpoq utaqqisitamik ulluni 14-ni pineqaatissinneqarsimasunut inissiisarfimmiittussanngortinneqarnermik ukiumik ataatsimik misiligaaffilikkamik.

 

Suliap normua: K 108/22

Eqqartuussissutit nassuiaatillu