22 aug 2022
Nunatta Eqqartuussisuuneqarfia
Suliami pisimasut aappaanni pinngitsuutinneqarluni - K 093/22
Angut 28-nik ukiulik Qaasuitsup eqqartuussivianit eqqartuunneqarpoq qaammatini arfinillini pineqaatissinneqarsimasunut inissiisarfimmiittussanngortinneqarpoq, siorasaarisimanermigut aamma nakuusersimanermut.
Eqqartuussissut Nunatta Eqqartuussisuuneqarfianit oqaatigineqarpoq ulloq 22. august 2022.
Pinerlineqartup nassuiaareerneratigut sanilliunneqarlutik suliamut nakorsap oqaaseqaatai, nunatta eqqartuussisuuneqarfianit uppernarsineqarpoq, unnerluutigineqartoq unnerluussissutip pisimasuani 1-mi allaaserineqartutut nakuusersimanermi pisuusoq.
Unnerluutigineqartoq suliap pisimasuata aappaani illuatungeriit assigiimmik piumasaqarnerat naapertorlugu pinngitsuutinneqarpoq.
Unnerluutigineqartoq utaqqisitamik qaammatini pingasuni pineqaatissinneqarsimasunut inissiisarfimmiittussanngortinneqarpoq ukiumik ataatsimik misiligaaffilikkamik Qaasuitsup Eqqartuussisoqarfiata eqqartuussutaatigut ulloq 22. maj 2020. Nakuusernermik pisimasoq suliami matumani pineqartoq piliarineqarsimavoq ulloq 27. juni 2020, tassa imaappoq, unnerluutigineqartup utaqqisitamik ilaatigut nakuusernermut pineqaatissinneqarsimasunut inissiisarfimmimiittussanngortinneqarneraniit qaammat ataaseq qangiuttoq. Taamatullu aamma utaqqisitamik pineqaatissinneqarsimasunut inissiisarfimmiittussanngortinneqarnermi misiligaaffiup ingerlanerani pisimalluni.
Taamaattumik nunatta eqqartuussisuuneqarfia isumaqarpoq pisariaqartoq utaqqisitaangitsumik eqqartuunneqassasoq suliami matumani pineqaatissinneqarsimasunut inissiisarfimmiittussanngortinneqarnermik, aammalu ataatsimoortitamik pineqatissiilluni eqqartuunneqassasoq, pisimasut ilanngunneqassallutik eqqartuussisoqarfiup eqqartuussutigisai ulloq 22. maj 2022.
Piffissaq suliap suliarineqarneranut atorneqartup sivisuallaarnera pissutigalugu ataatsimoortitamik pineqaatissiissut aalajangersarneqarpoq qaammatini sisamani pineqaatissinneqarsimasunut inissiisarfimmiittussanngortinneqarnermik.
Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, unnerluutigineqartoq suliami pisimasut aappaanni pinngitsuutinneqarluni aamma pineqaatissinneqarsimasunut inissiisarfimmiittussanngortinneqarneq appartinneqarpoq qaammatit sisammanngortillugit.
Suliap normua: K 093/22
Eqqartuussissutit nassuiaatillu