Mianersuaalliornikkut inoqammik toqutsineq - K 126/22

Dom afsagt: 8. aggustip 2022

Eqqartuussissut Nunatta Eqqartuussisuuneqarfianit oqaatigineqarpoq ulloq 8. august 2022.

Unnerluutigineqartoq eqqartuunneqarpoq mianersuaalliornikkut inoqammik toqutsinermut ullormi 4. juli 2021 imigassamik aalakoornartulimmik sunnersimaneqarluni qoorortooq. 22 magnum hollow point imassamik immersimallugu, nukappiaqqamullu 14-nik ukiulimmut saatillugu qanillugu igeriassutigisimallugu, taamaalilluni nukappiaraq 14-nik ukiulik igerianeranit eqqorneqarluni imalu annertutigisumik aaqqunarneqarsimalluni, nukappiaraq 14-nik ukiulik toqukkut qimagussimalluni.

Suliamit ersersinneqarpoq, aallaasip parnaarsaataa ajormanngitsoq aamma eqittaataa imatut inissinneqarsimasoq, 2 kg-p missaanik oqimaassusilimmik naqinneraneratigut aallaannittoqarsinnaalluni.

Mianersuaalliorneq unnerluutigineqartup suliami matumani iliuuserisaa isigineqartariaqarpoq peqqarniilluinnartutut, iluuserisaalu kinguneqarpoq nukappiaqqap 14-nik ukiullip ilungersunartumik ajoquserneranik, aallaat nukappiaraq toqukkut qimagussimalluni. Nunatta eqqartuussisuuneqarfiata nalilerpaa pineqaatissiineq suliami taama peeqqarniitsigisumi aallaavittut minnerpaamik ukiup aappaata affaanik pineqaatissinneqarsimasunut inissiisarfimmiittussanngortinneqaataasariaqartoq.

Sakkortusaataavoq unnerluutigineqartoq pisumut ulorianartumut iliuuseqartuunera nukappiaqqap 14-nik ukiullip toquneranik kinguneqartumik. Taamaaliornermi unnerluutigineqartoq qoorortuumik pissarsimavoq, taannalu atorlugu. Taamatullu aamma unnerluutigineqartoq nassarsimalluni imigassamik kimittuumik, pisimasumullu atatillugu imersimasaminik. Taamatullu aamma sakkortusaatitut isumaqarfigineqarluni unnerluutigineqartup isumagisimanngimmagu eqqortumik sukkasuumillu ajutoorneq pillugu kalerriinissaq, kisianni piffik qimassimallugu 14-nik ukiulilik toqulersoq nukappiaqqamut allamut 13-nik ukulimmut qimaannarsimallugu.

Pissutsit taamaannerisigut nunatta eqqartuussisuuneqarfia isumaqarpoq suliaq ima peqqarniitsigisoq, pisariaqarluni utaqqisitaanngitsumik pineqaatissinneqarsimasunut inissiisarfimmiittussanngortitsinissaq, naak unnerluutigineqartoq 18-it inorlugit ukioqaraluartoq.

Oqaaseqaatinit saqqummiunneqartunit takutinneqaraluartoq, unnerluutigineqartoq inuttut assigiinngitsutigut unamminartorsioraluartoq, nakorsap misissuinerata imaluunniit Pinerluttunik Isumaginnittoqarfiup inummik misissuinerata takutinngilaa kinguneqartitsisoqarsinnaaneranik unnerluutigineqartoq pineqaatissinneqarsimasunut inissiisarfimmiittussanngortitsinermit allaanerusumik pineqaatissinneqarluni eqqartuunneqarsinnaanera.

Taamaattumik, unnerluutigineqartup ukiumigut inuusunnera isiginiarneqarluni, pineqaatissiissut aalajangersarneqarpoq ukiumi ataatsimi pineqaatissinneqarsimasunut inissiisarfimmiittussanngorneqarnermik, tak. pinerluttulerinermik inatsimmi § 147, imm. 1, tak. § 146, tak. § 87.

Unnerluutigineqartup akuersaarmagu taarsiissutissaq aamma ajungitsorsiassaq unnerluussisussaatitaasunit piumasaqaatigineqartoq malillugu eqqartuussisoqarfiup aalajangigaa, eqqartuussisoqarfiup tamanna pillugu aalajangersaanera atuuttussanngortinneqarpoq.

Unnerluutigineqartoq eqqartuunneqarpoq ukiumi ataatsimi pineqaatissinneqarsimasunut inissiisarfimmiittussanngortinneqarnermik.

Eqqartuussisoqarfiup eqqartuussutaa taarsiissutissanut aamma ajungitsorsiassanut qimagaasunut tunngasoq atuuttussanngortinneqarpoq.

Suliap normua: K 126/22

Eqqartuussissutit nassuiaatillu