13 feb 2023
Nunatta Eqqartuussisuuneqarfia
Ukiut pingasut qaammatillu arfinillit inissiisarfimmi - K 011/23
Angut 25-nik ukiulik eqqartuunneqarpoq ukiuni marlunni pineqaatissinneqarsimasunut inissiisarfimmiittussanngorlugu, taanna marloriarluni meeqqamik pinngitsaaliilluni atoqateqarsimasutut, pisimasup aappaani meeraq 15-init inorlugit ukiulik, aappaanilu meeraq 12-t inorlugit ukiulik.
Eqqartuussissut Nunatta Eqqartuussisuuneqarfianit oqaatigineqarpoq ulloq 13. februar 2023.
Unnerluutigineqartoq eqqartuussisoqarfiup eqqartuussutaatigut eqqartuunneqarpoq meeqqamik 15-it inorlugit ukiulimmik pinngitsaaliisimasutut, ullormi 23. marts 2016 11-nik ukiulik niviarsiaraq pinngitsaalillugu atoqatigigamiuk, aamma pinngitsaalillugu usuni milutsissimallugu. Taamatullu aamma eqqartuunneqarpoq meeqqamik pinngitsaaliinermut ullormi 29. september 2020 14-nik ukiulik niviarsiaraq pinngitsaalillugu atoqatigigamiuk. Pisuunermik apeqqut suliareqqitassanngortinneqanngilaq.
Nunatta eqqartuussisuuneqarfianit eqqartuussisoqarfik isumaqatigineqarpoq, suliami taamatut isikkulimmi utaqqisitaanngitsumik pineqaatissinneqarsimasunut inissiisarfimmiittussanngortitsineermik eqqartuussuteqartoqassammat, aamma nunatta eqqartuussisuuneqarfiata pineqaatissinneqarsimasunut inissiisarfimmiittussanngortinneqarneq sivitsuiffigivaa ukiunut pingasunut aamma qaammatinut arfinilinnut.
Pineqaatissiissummik aalajangersaanermi eqqartuussisuuneqarfiup pingaartippaa, unnerluutigimeqartoq suliami matumani eqqartuunneqarmat marloriarluni meeqqamik atassuteqarnikkut pinngitsaaliinermut, pisimasumi siullermi meeraq 11-nik ukiulik, pisimasup aappaani meeraq immikkut qajannassusiliulluni. Taamatullu aamma eqqartuussisuuneqarfimmit sakkortusaatitut pingaartinneqarpoq, unnerluutigineqartoq pisimasut marluk suliami matumani pineqartut akornatigut ilaatigut eqqartuunneqarsimammat pingasoriarluni meeqqamik kinguaassiutitigut atoqatiginninnermut.
Aamma eqqartuussisuuneqarfimmit isiginiarneqarsimavoq unnerluutigineqartoq 18-iinnarnik ukioqarsimammat 2016-imi niviarisaraq 11-nik ukiulik pinngitsaaligamiuk, nalilersuisnermilu aamma ilaatinneqarpoq pisimasoq 2020-mi piliarineqartoq kiisalu pisimasut pingasut 2019-mi Kalaallit nunaata Politiivinut nalunaarutigineqarsimammata. Piffissaq suliap suliarineqarneranut atorneqartup taama sivisutiginera unnerluutigineqartup pisuussutiginngilaa.
Nunatta eqqartuussisuuneqarfianit niviarsiaqqap mitagaaneranut ajunngitsorsiassaq 120.000 kr.-inut qaffanneqarpoq. Ajunngitsorsiassamik aalajangersaanermi eqqartuussisuuneqarfiup ingammik pingaartippaa niviarsiaraq pinerliiviup nalaani 15-it inorlugit ukioqarsimammat aamma pissutigineqarpoq niviarsiaqqap aamma unnerluutigineqartup ukiumikkut nikinganerat.
Mitagaanermut ajunngitsorsiassaq niviarsiaqqap aappaanut tunngasoq atuuttussanngortinneqarpoq. Tamatumani isiginiarneqarluni meeqqamik pinngitsaaliineq pineqarmat, taanna 11-iinnarnik ukioqartoq, pisimasorlu piliarineqarsimalluni mitagaanermut ajunngitsorsiassanik april 2018-mi qaffaaneq sioqqullugu.
Unnerluutigineqartoq eqqartuunneqarpoq ukiuni pingasuni aamma qaammatini arfinilinni pineqaatissinneqarsimasunut inissiisarfimmiittussanngortinneqarluni.
Unnerluutigineqartup qaammat ataaseq qaangiutsinnagu niviarsiaqqamut akilissavai 120.000 kr.-it. Mitagaanermut ajunngitsorsiassaq 11-nik ukiulimmut niviarsiaqqamut tunngasoq atuuttussanngortinneqarpoq imatut uparuaaserlugu, aningaasat qaammatip ataatsip ingerlanerani akilerneqassapput. Mitagaanermut ajunngitsorsiassat ernialersorneqassapput suliap ingerlanneqarnerani ernialiussanik ulloq 13. marts 2023 aallarnerfigalugu.
Suliap normua: K 011/23
Eqqartuussissutit nassuiaatillu