Gå til sidens indhold

Nunatta Eqqartuussisuuneqarfia

03 dec 2020

Nunatta Eqqartuussisuuneqarfia

Ulluni 40-ni inissiisarfimmiittussanngortinneqartoq K - 074/18

Angut 26-nik ukiulik arnamik sakiaasigut ajatsisimanermut tulliatigullu talerperlikkut tilluinermut Qaasuitsup Eqqartuussisoqarfianit eqqartuunneqarsimavoq ulluni 60-ini inissiisarfimmiittussanngortinneqarluni utaqqisitamik ukiuni pingasuni misiligaaffiliinertalimmik.

Eqqartuussisoqarfiup eqqartuussutaa taanna unnerluussisussaatitaasunit suliareqqitassanngortinneqarpoq sakkortusaanissaq piumasaqaatigineqarluni.

Nunatta Eqqartuussisuuneqarfiata inerniliinera

Nunatta Eqqartuussisuuneqarfiata eqqartuussut ulluni 40-ni inissiisarfimmiittussanngortitsinermut allanngortippaa.

Sakkortusaataasutut nunatta eqqartuussisuuneqarfiata pingaartippaa unnerluutigineqartoq nakuusernermut ukiut kingulliit pingasut ingerlaneranni pingasoriarluni eqqartuussaanikuusoq aamma siornatigut eqqartuussaanermi kingorna pinerloqqipallattarsimasoq. Taamaattumik eqqartuussisut pineqaatissiissutip utaqqisitanngortinneqarnissaa nakkutigisassanngortitsilluniluunniit eqqartuussuteqarnissaq tunngavissaqarsorinngilaat.

Pinerlineqartup pisimasoq sioqqutitsiarlugu nerrivimmik unnerluutigineqartup tungaanut uppititsilluni kamassaarisimanera sakkukillisaataasutut nunatta eqqartuussisuuneqarfiata pingaartippaa.

Ulloq aalajangiiffiusoq

Eqqartuussut Nunatta Eqqartuussisuuneqarfianit nalunaarutigineqarpoq ulloq 27. juni 2018.

Suliap normua: K 074/18

Nunatta Eqqartuussisuuneqarfiata eqqartuussissutaa

Qaasuitsup eqqartuussiviata eqqartuussissutaa

Nassuiaatit