24 okt 2019
Nunatta Eqqartuussisuuneqarfia
Kr. 3.000-inik akiligassinneqarneq - K 172/19
Angut 47-nik ukiulik aqqusinertigut angallannermut inatsimmik unioqqutitsinermut Qaasuitsup Eqqartuussisoqarfianit pisuutinneqarsimavoq, taannami aqqusinertigut angallannermi isumannaatsuunissamut soqutigisassanik pingaarutilinnik sumiginnaalluni mianersunngitsoorsimavoq,
pisuinnartormi qanittuararsuullugu saneqqunniarlugu aporsimavaa uninnanilu ingerlaqqissimalluni. Eqqartuussisoqarfiup taanna kr. 2.500-nik akiligassissimavaa ukiumilu ataatsimi biilersinnaanermut allagartaajarsimallugu.
Unnerluutigineqartoq aamma nivissamik iviangiisigut attuuannissimanermut atisaasalu qaavisigut nalikkaassiuisimanermut kiisalu usumminik nivissamut piumanngitsumut attuuatitsiniaanermut kunissiniaanermullu pisuutinneqarpoq. Eqqartuussisoqarfiup unnerluutigineqartoq qaammatini qulingiluani inissiisarfimmiittussanngortillugu eqqartuussimavaa.
Unnerluutigineqartup eqqaartuussut taanna suliareqqitassanngortippaa, pinngitsuutitsinissaq piumasaqaatigalugu. Unnerluussisussaatitaasunit piumasaqaatigineqarpoq saniatigut akiligassiissut kr. 3.000-inut qaffanneqassasoq.
Eqqartuussisuuneqarfiup inerniliinera
Eqqartuussisoqarfiup pisimasoq 1-imi uppernarsaatinik inerniliisimanera eqqartuussisuuneqarfiup isumaqatigaa, unnerluutigineqartorlu aqqusinertigut angallannermut inatsisip § 22-anik, mianersortussaagaluarluni pisariaqartumik mianersunnginneq, unioqqutitsinermut pisuutippaa. Unnerluutigineqartup aqqusinertigut angallannermi isumannaatsuunissamut soqutigisassanik ataasiarluni taamaallaat sumiginnaasimanera eqqarsaatigalugu biilersinnaanermut allagartajaanissaq utaqqisitaq taamaallaat tunngavissaqarsorineqarpoq.
Eqqartuussisuuneqarfiup unnerluutigineqartoq kannguttaalliornermut pinngitsuutippaa, unnerluutigineqartummi tamatumani pisuunera unnerluussisussaatitaasut eqqartuussinissamut pisariaqartumik uppernarsanngilaat. Eqqartuussisuuneqarfiup pingaartippaa nivissap naammattumik qularnaassuseqartumik ataqatigiissumillu nassuiaateqannginnera, aamma nivissap iliuutsinut pinaaserniarsimanera qularnaarlugu aalajangersarneqarsinnaanngimmat. Tamanna tunngavigalugu unnerluutigineqartoq pinerluttulerinermi inatsimmik unioqqutitsinermut pinngitsuutinneqarpoq.
Saniatigut akiligassiissut kr. 3.000-inut qaffanneqarpoq.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 24. oktober 2019
Suliap normua: K 172/19
Nunatta Eqqartuussisuuneqarfiata eqqartuussissutaa
Qaasuitsup eqqartuussiviata eqqartuussissutaa