21 okt 2019
Nunatta Eqqartuussisuuneqarfia
Qaammatini 4-ni inissiisarfimmiittussanngortitsineq allanngortinneqarpoq
Angut 36-nik ukiulik Qaasuitsup Eqqartuussivianit nakuusernermut pisuutinneqarpoq, pinerlisaq 1 kiinaatigut patissimagamiuk, taamaalineqarnermigut pinerlisaq isimi talerpilliup eqqaatigut kilerluni kiisalu isimi eqqaatigut pullanneqalerluni.
Unnerluutigisaq siusinnerusukkut nakuusernermut pineqaatissinneqarsimammat, inatsisinillu unioqqutitsineq piffissap misiliiffiusup iluani piliarineqarsimammat, ataatsimoorussamik pineqaatissinneqarpoq qaammatini sisamani inissiisarfimmiittussanngorlugu.
Eqqartuussiviup eqqartuussutaa unnerluutigisamit suliareqqitassanngortinneqarpoq pinngitsuutitaanissaq piumasaqaatigalugu.
Eqqartuussisuuneqarfiup inerniliinera
Eqqartuussisuuneqarfiup eqqartuussiviup pisuunermut naliliinera akueraa unnerluutigisarlu pinerluttulerinermi inatsisip §.iisa 88-ianik unioqqutitsimasoq pinerlisaq kiinaatigut patikkamiuk. Pineqaatissiissutissap aalajangerniarnerani eqqartuussisuuneqarfiup pingaartutut isigaa, unnerluutigisaq siusinnerusukkut pinerlisamut tassunga nakuusernermut eqqartuussaasiammat, inatsisinillu unioqqutitsineq pisimasoq siusinnerusukkut pineqaatissiissutaasup qanittuani. Eqqartuussisuuneqarfiuttaaq eqqartuussivitulli ataatsimoorussamik pineqaatissiissuteqassasoq aalajangerpaa, naammattutulli isigalugu unnerluutigisaq eqqartuunneqarpat inuiaqatigiinni sulisitaanissamik. Unnerluutigisaq tamatuma kingorna peqquneqarpoq akissarsiaqarani inuiatigiinni sulisitaassasoq nalunaaquttap akunnerini 100-ni piffissap sivisunerpaaffiusup qaammatinik arfinilinnik sivisussusillip iluani, taamatuttaarlu pinerluttunik isumaginnittoqarfimmit nakuutigisaassasoq.
Aalajangiinerup ullua
Nunatta Eqqartuussisuunearfiata eqqartuussut oqaatigaa ulloq 21. oktobari 2019.
Suliap normua: K 021/19
Nunatta Eqqartuussisuuneqarfiata eqqartuussutaa
Qaasuitsup eqqartuussiviata eqqartuussutaa