01 okt 2019
Nunatta Eqqartuussisuuneqarfia
Inissiisarfimmiittussanngortitsineq - K 209/19
Angut 35-nik ukiulik hashimik 8,8 kg-mik Danmarkimiit Nunatsinnut eqqussinermut peqataasimasutut Eqqartuussisoqarfimmit Sermersuumit pisuutinneqarpoq.
Eqqartuussisoqarfiup tunngaviutippaa unnerluutigineqartoq eqqussinermi ataqatigiissaarisutut atuuffeqarsimasoq aamma suliffimmini aqutsisutut atorfeqarnini atornerlullugu sulisuni immikkut aningaasannannissaannik pilerisaarlugit poortukkanik hashimik imalinnik Danmarkimeersunik tigusisuutittarsimagai. Hashimik tuniniaaneq aaqqissuulluagaavoq.
Eqqartuussisoqarfiup unnerluutigineqartoq ukiuni marlunni qaammatinilu marlunni inissiisarfimmiittussanngortippaa, taamatuttaaq suliamut aningaasartuutinik akiliisussanngortinneqarpoq.
Unnerluutigineqartup eqqartuussut taanna eqqartuussisuuneqarfimmut suliareqqitassanngortippaa, sakkukillisaavigineqarnissaq piumasaqaatigalugu.
Eqqartuussisuuneqarfiup inerniliinera
Eqqartuussisuuneqarfik isumaqataalluni isumaqarpoq unnerluutigineqartoq hashimik 8,8 kg-mik eqqussinermut atatillugu pingaarutilimmik atuuffeqarsimasoq, taassumami adressit nassiussanut atorneqartussat pissarsiarisimavai. Haship anngiortumik eqqunneqartup annertussusia eqqarsaatigalugu eqqartuussisuuneqarfiup pineqaatissiissut naleqquttumik sivisussusilerneqarsimasoraa, eqqartuussisoqarfiullu eqqartuussutaa atuuttussanngortippaa.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 1. oktober 2019
Suliap normua: K 209/19
Nunatta Eqqartuussisuuneqarfiata eqqartuussissutaa
Sermersuup eqqartuussiviata eqqartuussissutaa