23 okt 2019
Nunatta Eqqartuussisuuneqarfia
Kannguttaalliorfiginninneq pillugu suliami pinngitsuutitsineq - K 202/19
Angut 44-nik ukiulik usumminik tissartumik nukappiaqqamut qulinik ukiulimmut takutitsisimasutut kannguttaalliorfigalugulu takkuani tissassarsimasutut unnerluutigineqarpoq. Unnerluutigineqartoq pisuunnginnerarpoq.
Unnerluutigineqartoq eqqartuussisoqarfimmit eqqartuunneqarpoq ulluni 20-ni inissiisarfimmiittussanngortinneqarluni, mitagaanermullu taarsiissutinik kr. 5.000-inik nukappiaqqamut akiliisussanngortinneqarluni.
Unnerluutigineqartup eqqartuussut taanna eqqartuussisuuneqarfimmut suliareqqitassanngortippaa pinngitsuutitsinissaq piumasaqaatigalugu.
Eqqartuussisuuneqarfiup inerniliinera
Eqqartuussisuuneqarfimmi aalajangeeqataasut isumaqatigiinnatik aalajangiipput. Eqqartuusseqataasut ilaata ataatsip nukappiaqqamik killisiuineq aallaavigalugu uppernarsarneqarsimasoraa unnerluutigineqartup taanna kannguttaalliorfigisimagaa usuni taassumunnga takutillugu, uppernarsarneqarsorinngilaali unnerluutigineqartoq taassuma takkuani tissassarsimasoq. Eqqartuusseqataasut marluk unnerluutigineqartup tamakkiisumik pinngitsuutinneqarnissaa taasissutigaat, suliamimi paasissutissat tamarmiusut aallaavigalugit unnerluutigineqartoq nukappiaqqamut kannguttaalliorfiginnissimasutut eqqartuutissallugu naammattumik qularnaarisoqarluni tunngavissaqanngilaq.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 23. oktober 2019
Suliap normua: K 202/19
Nunatta Eqqartuussisuuneqarfiata eqqartuussissutaa
Qaasuitsup eqqartuussiviata eqqartuussissutaa