12 dec 2019
Nunatta Eqqartuussisuuneqarfia
Ukiut qulingiluat qaangiummata misiligummik iperagaasoq - K 266/19
Angut 56-nik ukiulik kinguaassiuutitigut pinerluuteqarsimanermigut Danmarkimi Pinerluttunik Isumaginnittoqarfiup ataani piffissami killiligaanngitsumi tarnimikkut napparsimasunut pineqaatissinneqarsimasunut inissiisarfimmiittussanngorlugu Qaasuitsup Eqqartuussiviani 2010-mi eqqartuunneqarpoq.
Eqqartuussap misiligummik iperagaanissani eqqartuussisoqarfimmut piumasaqaatigaa, tamannalu eqqartuussisoqarfiup malitseqartinngilaa. Eqqartuussisoqarfiup ilaatigut tunngavilersuutigaa misiligummik suli iperaasoqartinnagu eqqartuussap najorteqarnani aneertarsimanera, weekenderiartarsimanera il. il, taaamaattoqarsimanissaalu pillugu paasissutissartaqannginnera.
Unnerluutigineqartup aalajangiineq Nunatta Eqqartuussisuuneqarfianut aalajangeqqitassanngorlugu ingerlateqqippaa.
Eqqartuussisuuneqarfiup inerniliinera
Eqqartuussisuuneqarfiup tunngavilersuutigaa unnerluutigineqartoq 2018-mili kinguaassiuutitigut perususseqartarnermik annikillisaataasunik ataavartumik nakorsaatitorsimanera kiisalu inooqataaqqilernissamut sungiusarnerminik ingerlatsingaatsiareersimanera soorluttaaq inissinneqarsimasut allat sulisullu akornanni inooqataanera ajunngitsumik ingerlanera.
Eqqartuussisuuneqarfiup ataatsimoorussamik naliliinerup kingorna pineqaatissiissutip eqqartuussutigineqarsimasup allanngornagu atuutsitiinnarnissaa tunngavissaqartinngilaa, taamaammat eqqartuussaq misiligummik iperagaavoq ilaatigut ukiuni tallimani nakkutigineqarnissamik kiisalu kinguaassiuutitigut perusussuseqartarnermik annikillisaataasunik nakorsaatitornissamik piumasaqaatitalerlugu.
Ulloq aalajangiiffik
Nunatta Eqqartuussisuuneqarfianit eqqartuussut nalunaarutigineqarpoq ulloq 12. december 2019-imi.
Suliap normua: K 266/19
Nunatta Eqqartuussisuuneqarfiata aaliangigaa
Qaasuitsup eqqartuussiviata aaliangigaa