Gå til sidens indhold

Nunatta Eqqartuussisuuneqarfia

29 apr 2021

Nunatta Eqqartuussisuuneqarfia

Ikiaroornartulerinermik pineqaatissiissut sakkukillilerneqartoq K 035/19

Eqqartuussisoqarfiup Sermersuup angut 35-nik ukiulik ikiaroornartumik hashimik tuniniaqqitassamik anngiortumik marloriarluni eqqussinermut, sukasaatinik tigumiaqarnermut ikiaroornartunillu ingerlatitseqqiinermut eqqartuuppaa.

Nunatta Eqqartuussisuuneqarfiata inerniliinera

Nunatta Eqqartuussisuuneqarfiata uppernarsarneqarsoraa unnerluutigineqartoq aningaasanut kr. 586.500-nut tunngatillugu ikiaroornartunik ingerlatitseqqiinermut pisuusoq. Eqqartuussisut ilaatigut pingaartippaat unnerluutigineqartup nassuernera aningaaserivimmiillu paasissutissat saqqummiunneqartut. Nunatta Eqqartuussisuuneqarfiata illuatungeriit isumaqatigalugit uppernarsarneqarsimasorinngilaa kr. 120.000-it ikiaroornartumik ingerlatitseqqiinermeersuusut, angullu unnerluussutip taakkutsitartaanut pinngitsuutinneqarpoq. Pappiaqqat biilit tunniunneqarnerannut tunngasut saqqummiunneqartut Nunatta Eqqartuussisuuneqarfiata pingaartippai.

Eqqartuussisoqarfiup arsaarinnissuteqarneq pillugu eqqartuussutaa Nunatta Eqqartuussisuuneqarfiata atuuttussanngortippaa, ima allannguuserlugu aningaasat arsaarinnissutigineqartut kr. 586.500-nut appartinneqarlutik.

Eqqartuussisuuneqarfiup pineqaatissiissut ukiuni marlunni qaammatinilu marlunni inissiisarfimmiittussanngortitsinermut aalajangersarpaa. Nunatta Eqqartuussisuuneqarfiata suliami assingusuni pineqaatissiissutaasartunut sulisaaseq nalinginnaasoq pingaartippaa, sakkortusaataasutullu nunatta eqqartuussisuuneqarfiata pingaartippaa pinerlunneq aaqqissuulluagaq pineqartoq, tassani unnerluutigineqartoq pingaartumik inissisimaffeqarsimalluni.

Pineqaatissiissut eqqartuussisoqarfiup eqqartuussutaanut naleqqiullugu sakkukillisaavigineqarmat aamma unnerluutigineqartoq ikiaroornartunik ingerlatitseqqiineq pillugu piumasaqaatip ilaanut pinngitsuutinneqarmat eqqartuussisuuneqarfik isumaqarpoq naalagaaffiup karsiata suliamut aningaasartuutit akilissagai.

Ulloq aalajangiiffiusoq

Eqqartuussut Nunatta Eqqartuussisuuneqarfianit oqaatigineqarpoq ulloq 27. februar 2019.

Suliap normua: K 035/19

Nunatta Eqqartuussisuuneqarfiata eqqartuussutaa

Sermersuup eqqartuussiviata eqqartuussutaa

Nassuiaat