Kannguttaatsuliorfiginninnermi nakuusernermilu eqqartuussut - K 092/18

Angut 22-inik ukiulik Qeqqata Eqqartuussisoqarfianit eqqartuunneqarpoq utaqqisitamik qaammatini pingasuni pineqaatissinneqarsimasunut inissiisarfimmiittussanngortinneqarluni, pinerluttulerinermi inatsimmi § 77, imm. 1, nr. 2-mik unioqqutitsisimanermut.

Unnerluussaq unnerluutigineqarpoq pinerluttulerinermi inatsimmi § 77, imm. 1, nr. 2-mik unioqqutitsinermut, pisimasoq eqqartuussisoqarfimmit nr. 2-ngortinneqarpoq, eqqartuussisoqarfimmit taamaallaat uppernarsineqarmat unnerluutigineqartup pisuunera unioqqutitsilluni pinngitsaaliilluni atoqatiginninnermut. Taamatuttaaq unnerluutigineqartoq unnerluussaaqatini 33-inik ukiulik peqatigalugu unnerluutigineqarpoq angerlarsimaffimmi eqqissiviilliortitsinermut, nakuusernermut aamma siorasaarinermut, pinngitsuutinneqarlunili unnerluussissummi piffissaq oqaatigineqartoq kukkusumik oqaatigineqarsimammat.

Unnerluussisussaatitaasunit eqqartuussisoqarfiup eqqartuussutaa suliareqqitassanngortinneqarpoq pingaarnertut piumasaqaataalluni eqqartuussisoqarfiup kukkusumik suliamik suliaqarsimanera pissutigalugu utertinneqassasoq, tamanna pisinnaanngippat tulliullugu sakkortusaaffigineqassasoq.

Eqqartuussisuuneqarfiup inerniliinera

Aallaqqaasiutigalugu eqqartuussisuuneqarfiup oqaatigivaa, suliaq – taanna suliarineqarpoq uppernarsaasiilluni suliaqqitassanngortitatut – unnerluutigineqartorlu pillugu nutaarluinnarmik uppernarsaasiiffigineqarluni nalilersorneqartussaalluni, taamaattumik suliap kukkusumik suliarineqarsimanera taamaallaat qaqutiguuissumik utertitsissutaasinnaalluni. Taamaattumik tamanna pissuteqarpoq eqqartuussisuuneqarfiup uppernarsaatinik naliliineranik, eqqartuussisoqarfik pisimasoq 1-mi kukkunikkut pinerluttulerinermi inatsimmi § 77, imm. 1, nr.2-ngortitsisimanera, pinerliinerullu imarisaa piviusunngortinneqarsimanani. Taamatuttaaq aamma ilaatinneqarpoq eqqartuussisoqarfiup uppernarsaatinik nalilersuinerani eqqartuussisoqarfik paatsooruteqarsimanersoq pissutsini pingaarnerunngitsuni unnerluussummik saneqqutsinissamut atatillugu. Taamaattumik eqqartuussut utertinneqanngilaq.

Pisimasoq 1-mi eqqartuussisuuneqarfimmit taamaallaat uppernarsineqarpoq unnerluutigineqartup pisuunera pinerlisamik aalajangeeqqasimanera truusiisa qaavisigut utsuisigut attuuanninnermi, taamaattumillu pisimasoq pinerluttulerinermi inatsimmi § 84, imm. 1, nr.1-nngortinneqarpoq, annertussusianiit annikinnerummat.

Eqqartuussisuuneqarfiup akuersissutigivaa unnerluussissutip iluarsiiffigineqarnissa, piffissarlu pinerliiffik allanngortinneqarpoq suliami pisimasuni 2, 3 aamma 4-mi. Unnerluutigineqartut marluullutik pisuutinneqarput suliami pisimasuni 2 aamma 3-mi angerlarsimaffimmi eqqissiviilliortitsinermut aamma nakuusernermut. Pisimasoq 4-mi unnerluutigineqartoq 33-inik ukiulik pisuutinneqarpoq siorasaarinermut, unnerluutigineqartoq 22-inik ukiulik pinngitsuutinneqartoq.

Unnerluutigineqartoq 22-inik ukiulik pineqaatissinneqarpoq qaammatini pingasuni pineqaatissinneqarsimasunut inissiisarfimmiittussanngortinneqarluni, ukiunik marlunnik misiligaaffilerneqarluni utaqqisitanngortinneqartumik. Suliallu pisimasuani 1-mi unnerluutigineqartoq pisussaaffilerneqarpoq pinerlineqartumut mitagaaneranut ajunngitsorsiassanik akiliisussanngortinneqarluni.

Unnerluutigineqartoq 33-inik ukiulik pineqaatissinneqarpoq ulluni 60-ni pineqaatissinneqarsimasunut inissiisarfimmiittussanngortinneqarluni, siusinnerusukkut assingusumik pinerluuteqarsimanerminut pineqaatissinneqarnikooreersimammat.