29 apr 2021
Nunatta Eqqartuussisuuneqarfia
Imerniartarfimmi sulisoq eqqartuunneqarpoq - K 198/18
Angut 24-nik ukiulik imerniartarfimmi sulireernerup kingorna, tunisaqarnermi kaaviiaartitat kiisalu imerniartarfiup qarasaasiaa angallattagaq harddiskillu marluk angerlaassimavai. Sapaatip akunnerata naanerani aningaasat kaaviiaartitat tammarsimapput
Taanna angut 24-nik ukiulik Eqqartuussisoqarfik Sermersuumit pisuutinneqarpoq pinerluttulerinermi inatsimmik § 106, imm. 1, nr. 1 peqquserluuteqarnikkut unioqqutitsisimasutut tillinnerlu pillugu unnerluussissummut pinngitsuutitaalluni. Eqqartuunneqarpoq ulluni 60-ini pineqaatissinneqarsimasunut inissiisarfimmiittussanngorlugu.
Eqqartuussiviup eqqartuussutaa unnerluutigineqartumit suliareqqitassanngortinneqarpoq.
Nunatta eqqartuussisuuneqarfiata inerniliinera
Nunatta eqqartuussisuuneqarfiata eqqartuussivik isumaqatigaa, tassa unnerluutigineqartup tillinneq pillugu pinngitsuutinneqarnissaanut tunngatillugu, nalinginnaasumik qarasaasiaq, harddiskit aningaasallu matureernerup kingorna imerniartarfimmiitsinneqarneq ajormata.
Nunatta eqqartuussisuuneqarfia isumaqarpoq uppernarsisinneqartoq, unnerluutigineqartoq peqquserlussimasoq, unnerluussissummi pisimasoq 2-mi allassimasutut. Ilaatigut unnerluutigineqartoq nassuiaasimammat, aningaasat sapaatip akunnerata naanerani tammarsimasut, unnerluutigineqartumit paarineqarnerata nalaani, aamma suliami ilisimannittut nassuiaataat naapertorlugit.
Pineqaatissiissut aalajangerneqarpoq inuiaqatigiinni nalunaaqquttap akunnerini 60-ini sulisitaasussanngorlugu ukiumik ataatsimik sivisunerpaaffilerlugu.
Nunatta eqqartuussisuuneqarfiata pingaartippaa, pinerluuteqarnikkut iluanaaruteqarnissap pineqarnera, tassani unnerluutigineqartoq imminut pissarsitissimammat 7.000 koruuninik. Assingusumik pinerluuteqarsimaneq pillugu utaqqisitamik inissiisarfimmiittussanngortitsinerup piffissap misilinneqarfiusup iluani pinerluuteqarneq pisimammat, nunatta eqqartuussisuuneqarfia isumaqarpoq utaqqisitamik eqqartuussut naapertuutinngitsoq. Suliap qanoq ittuunera unnerluutigineqartullu inuttut atugai eqqarsaatigalugit, nunatta eqqartuussisuuneqarfia isumaqarpoq, pinngitsoorani pineqaatissinneqarsimasunut inissiisarfimmiittussanngortitsinissaq pisariaqanngitsoq.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 17. april 2019.
Suliap normua: K 198/19
Nunatta Eqqartuussisuuneqarfiata eqqartuussutaa