Qaammatini pingasuni inissiisarfimmiittussanngortinneqartoq - K 089/19

Angut 26-nik ukiulik sisamarialruni nakuusersimasutut, aserorterisimasutut kiisalu toqutseriarsimasutut Qeqqata Eqqartuussisoqarfianit ukiuni sisamani qaammatinilu arfinilinni inissiisarfimmiittuussanngortinneqarpoq.

Taassuma angut alla naqissummik savimernermik oqimaatsumik milorsimavaa niaquatigut annertuumik ajoquserlugu. Angut alla 38-nik ukiulik toqutseriaraluarnermut peqataasimasutut ukiuni pingasuni inissiisarfimmiittussanngortinneqarluni eqqartuunneqarpoq.

Eqqartuussisoqarfiup eqqartuussutaa taanna unnerluutigineqartunit eqqartuussisuuneqarfimmut suliareqqitassanngortinneqarpoq.

Eqqartuussisuuneqarfiup inerniliinera

Angutip 26-nik ukiullip pinerlineqartumik naqissut oqimaattoq atorlugu milorsisimanera unnerluussisussaatitaasut uppernarsarsimagaat eqqartuussisuuneqarfik eqqartuussisoqarfittulli isumaqarpoq. Uppernarsaatinik saqqummiussinerup kingorna isumaqartoqartariaqarpoq naqissut pinerlineqartup qitianut miloriunneqarsimasoq uppissimasorlu, upperneranilu pinerlineqartoq pukusummigut taassuminnga toqqitissimasoq. 26-nik ukiullip peqqarniitsorujussuarmik nakuusernermi saniatigut allamik siunertaqarsimanera eqqartuussisuuneqarfiup uppernarsarneqarsorinngilaa. Aamma pinerlineqartumik saassussigamik 26-nik ukiullip sakkulersorniarnera angutip 38-nik ukiullip nalusimanngikkaa eqqartuussisuuneqarfiup uppernarsarneqarsorinngilaa.

Naqissut atorlugu immikkut peqqarniissusilimmik pisoqarnerata saniatigut 26-nik ukiulik sunngitsunut sisamariarluni nakuusersimasutut eqqartuunneqarpoq. Tamatuma saniatigut nakuusernermut siornatigut eqqartuussaasareerpoq. Eqqartuussisuuneqarfiup 26-nik ukiulik taanna ukiuni pingasuni inissiisarfimmiittussangortillugu 38-nillu ukiulik, pinerlineqartumik isimmissaallunilu annersaasimasoq, qaammatini pingasuni inissiisarfimmiittussanngortillugu pineqaatissippai.