2.000 kr. akiligassissut hashimik 4,68 g. tigummiaqarnikkut - K 019/20

Eqqartuussissut Nunatta Eqqartuussisuuneqarfianit oqaatigineqarpoq ulloq 22. juli 2020.

Nunatta Eqqartuussisuuneqarfiata ilaasortaasa isumaqatigiissutigaat nassuiaatigineqartut kiisalu assit takutinneqartut hashilu arsaarinnissutigineqarsimasoq ilanngullugit uppernarsineqartoq, unnerluutigineqartoq hashimik 4,68 grammimik piffissami sumiiffimmilu unnerluussummi taaneqartumi tigummiaqarsimasutut pisuusoq. Nunatta Eqqartuussisuuneqarfiata ilaatigut tunngavilersuutigaa unnerluutigineqartup nammineq nassuiaanermini inissiamut apuukkami unnuap qeqqata missaani ulloq 12. maj 2018-mi hashimik nassarsimanerarnera, kiisalu politiassistentip nassuiaanerani haship arsaarinnissutigineqartup qanoq sulilu nassaarineqarsimanerat tunngavigineqarluni.

Eqqartuussisut marluk isumaqarput eqqartuussinissamut uppernarsineqanngitsoq hashi tuniniagassatut naatsorsuussaanersoq. Eqqartuussisut taakku ilaatigut tunngavilersuutigaat haship annikinnera tuniniarneqarnissamullu piareersarneqarsimannginnerat kiisalu nassuiaatigineqartut malillugit sumiffimmi pinerliiviusumi najuuttut ikiaroortussaasimanerat malunnarmat.

Eqqartuussisut taakku marluk ilanngullugu isumaqarput, 2.500 kr.-it arsaarinnissutaasut suminngaanneernerat nalorninartortaqartoq. Aningaasat amerlanngitsut pineqarput taakkulu unnerluutigineqartup aningaasarsiaanit Oddset-imiillu pissarsiaasimasinnaapput, soorluttaaq nammineq taamatut nassuiaasoq. Eqqartuussisut taakku taamaalillutik naammaginartumik uppernarsinngilaat, aningaasat taakku 2.500 kr.-it hashimik tuniniaanermit pissarsiaasut taamaammallu isumaqatigiipput unnerluussummi tassani pinngitsuutinniarlugu.  

Eqqartuussisoq ataaseq isumaqarpoq hashi tuniniaaqqinnissamut naatsorsuutaasoq uppernarsineqartoq. Eqqartuussisup taassuma tunngavilersuinera malillugu haship pooqarnera eqqaavaa kiisalu hashi klumpinut agguarneqarsimanera aammalu unnerluutigineqartumi aningaasat amerlasuut 100 kr.-ikkaartut nassaarineqarsimanerat. Eqqartuussisoq taanna ilanngullugu isumaqarpoq aningaasat 2.500 kr.-it hashimit pinngornerat uppernarsineqarsimasoq. Eqqartuussisup taassuma annermik tunngavilersuutigaa aningaasat ikiaroornartorsunnissimanerat kiisalu annikitsukkaarsimanerat.

Amerlanerussuteqartut aalajangiinerisa kingorna unnerluutigineqartoq unnerluussut malillugu sumiiffimmi piffissamilu taaneqartumi hashimik 4,68 grammimik nammineq atugassaminik paarisaqarsimasutut pisuutinneqarpoq.

Eqqartuussaaseq malillugu hashi pillugu suliani pineqaatissiinermi 2.000 kr.-nik akiligassiisoqartarpoq.

Eqqartuussisoqarfiup eqqartuussutaa hashimik 4,68 grammimik arsaarinnissuteqarnermut tunngasoq atuuttussanngortinneqarpoq. Unnerluutigineqartoq qulaani tunngavilersuutit allassimasut malillugit aningaasanik 2.500 kr.-nik arsaarinnissuteqarnermit pinngitsuutinneqarpoq.

Unnerluutigineqartoq hashimik nammineq atugassaminik paarisaqarsimasutut pisuutinneqarmat eqqartuussisuuneqarfik isumaqarpoq, eqqartuussisarnermi inatsimmi § 480, imm. 1 naapertorlugu naalagaaffiup karsiata suliami aningaasartuutinik akiliisussaanera suliami matumani malinneqartariaqartoq. Tamatuma kinguneranik naalagaaffiup karsiata suliami aningaasartuutit aalajangiisuuffiusuni tamani akilissavai.

Unnerluutigineqartoq 2.000 kr.-nik akiligassinneqarpoq.

Unnerluutigineqartumit hashi 4,68 grammi arsaarinnissutigineqarpoq.

Suliap normua: K 019/20

Eqqartuussissutit nassuiaatillu