Gå til sidens indhold

Nunatta Eqqartuussisuuneqarfia

12 okt 2020

Nunatta Eqqartuussisuuneqarfia

Tillinniarnermut, aserorterinermut angallannermi unioqqutitsineq k 185/19

Arnaq 23-nik ukiulik Eqqartuussisoqarfik Sermersuumit pisuni 20-nit amerlanerusuni tillinniarsimasutut, aserorterisimasutut, peqquserlussimasutut kiisalu imigassartorsimatilluni ingerlatsisimasutut pisuutinneqarpoq.

Siornatigut utaqqisitamik ulluni 40-ni kiisalu ukiumik ataatsimik misileraaffilikkamik pineqaatissinneqarsimasunut inissiisarfimmiittussanngorlugu pineqaatissinneqarsimavoq. Pisut marluk piffissap misileraaffiusup nalaani pinerluutigineqarsimapput pisullu amerlanerit suliami pisut naliliiffigineqartussat sioqqullugit pinerluutigineqarsimallutik.  

Eqqartuussiviup siornatigut pineqaatissiissutigineqarsimasoq atorunnaarsippaa unnerluutigineqartorlu qaammatini pingasuni pineqaatissinneqarsimasunut inissiisarfimmiittussanngorlugu eqqartuullugu, matumani siornatigut utaqqisitamik eqqartuussutaasimasoq ilanngunneqarluni pineqaatissiissut ataatsimoortunngortinneqarpoq. Unnerluutigineqartoq ilanngullugu pinerluttunik isumaginnittoqarfimmit ukiuni marlunni nakkutigisassanngortinneqarpoq. Tamatuma saniatigut unnerluutigineqartoq ukiumi ataatsimi ingerlatsisinnaanermut allagartaajarneqarpoq soorluttaaq 13.000 kr.-nik akiligassinneqartoq.

Unnerluutigineqartoq saniatigut pinerlinneqartunut tamanut taarsiisussanngortitaavoq.

Eqqartuussisuuneqarfiup inerniliinera

Eqqartuussisuuneqarfiup suliaq sivisussusiliillunbi suliareqqitassanngortitatut suliaraa. Unnerluutigineqartup eqqartuussisuuneqarfimmut piumasarisimavaa siornatigut utaqqisitamik eqqartuussutaareersoq ilanngunneqarnani unioqqutitsinerit pillugit immikkuteqqartuussuteqartoqassasoq.Eqqartuussisuuneqarfiup akueraa eqqartuussiviup siornatigut utaqqisitamik eqqartuussutaasimasumik atorunnaarsitsisimanera ataatsimoorussamillu pineqaatissiissummik aalajangersaasoqarnissaa.

Pinerluutigineqarsimasut suussusaat amerlassusaallu eqqarsaatigalugit eqqartuussisuuneqarfiup aalajangerpaa inissiisarfimmiittussanngortitsineq qaammatini sisamani pineqaatissinneqarsimasunut inissiisarfimmiittussanngortitsinertut sivitsorneqarnissaa.

Ilanngullugu eqqartuussiviup eqqartuussutaa atuuttussanngortinneqarpoq.

Aalajangiinerup ullua

Eqqartuussut Nunatta Eqqartuussisuuneqarfianit ulloq 5. september 2019 oqaatigineqarpoq.

Suliap normua: K 185/19

Nunatta Eqqartuussisuuneqarfiata eqqartuussutaa

Sermersuup eqqartuussiviata eqqartuussutaa