15-it inorlugit ukiulimmik kinguaassiutaatigut atoqatiginninneq - K 176/20

Eqqartuussissut Nunatta Eqqartuussisuuneqarfianit oqaatigineqarpoq ulloq 18. november 2020.

Unnerluutigineqartoq Sermersuup Eqqartuussisoqarfiani eqqartuussutikkut 24. juni 2020-meersukkut pinerluttulerinermi inatsimmi § 79 meeqqamut kinguaassiuutitigut atoqatigininninnermut pisuutinneqarpoq, minnerpaamik pingasoriarluni pinerlineqartoq pinerluffiup nalaani 14-inik ukioqartoq atoqatigisimallugu. Suliaq eqqartuussisuuneqarfimmut pineqaatissiissummik apeqqut pillugu suliareqqitassanngortinneqarpoq.

Eqqartuussisuuneqarfiup qularutigineqanngitsumik tunngavigaat, aappariinnermut assigusumik pissuseqartoqarsimanera.

Pinerluttulerinermi inatsimmi § 79-imik unioqqutitsineq aallaavittut pinngitsoorani utaqqisitamik pineqaatissinneqarsimasunut inissiisarfimmiittussanngortitsinermik pineqaatissiissutaasariaqarpoq, unnerluutigineqartoq 22-t sinnerlugit ukioqarpat. Unnerluutigineqartoq pinerluuteqarnerup nalaani 32-nik ukioqarpoq.

Kisianni piffissaq suliap suliarineqarneranut qaammatit pingasungajaat atorneqartut eqqarsaatigalugit, eqqartuussisut isumaqarput, aallaavik suliami uani avaqqunneqartariaqartoq. Eqqartuussisuuneqarfiup pingaartumik pingaartippaat, suliap piffissani arlalinni eqqartuussisoqarfimmi uninngasimanera, suliallu suliarineqarneranut piffissaq atorneqartoq unnerluutigineqartumut tutsinneqarsinnaanngitsoq.

Taanna tunuliaqutaralugu, unnerluutigineqartullu tamatumunnga naleqquttuummat, pineqaatissiissut aalajangersarneqarpoq nalunaaquttap akunnerini 80-ini inuiaqatigiinnik sullissisussanngortitsinermik ukiumi ataatsimi Pineqaatissinneqarsimasunik Isumaginnittoqarfimmit nakkutigineqarnissamik piumasaqaasikkamik, pinerluttulerinermi inatsimmi § 140, imm. 1 najoqq. Inuiaqatigiinnik sullissinissap naammassineqarnissaanut piffissaq qaammatinut arfineq pingasunut sivisunerpaaffissalerneqarpoq.

Mitagaaneq pillugu taarsiivigineqarnissaq

Unnerluussisussaatitaasut pinerlineqartoq sinnerlugu katillugit 5.000 koruuninik taarsiinissamik piumasaqaateqarput.

Unnerluutigineqartup pinerlineqartullu akornanni aappariinnermut assigusumik pissuseqartoqarsimanera eqqarsaatigalugu, eqqartuussisuuneqarfik isumaqarpoq, pinerlineqartup inuttaanut ima kannguttaalliorfiginnittoqarsimanngitsoq, tunngavissaqarluni mitagaanermut taarsiisussaatitaanermi inatsimmi § 26 malillugu taarsiivigineqarnissaq. Tamanna tunuliaqutaralugu unnerluutigineqartoq mitagaaneq pillugu taarsiisussanngortitsinermik piumasaqaammut pinngitsuutinneqarpoq.

Eqqartuussisoqarfiup eqqartuussutaa allanngortinneqarpoq imaalillugu, unnerluutigineqartoq nalunaaquttap akunnerini 80-ini inuiaqatigiinnik sullisussanngortillugu, qaammatini arfineq pingasut qaangiutsinnagit naammassineqartussamik sivisunerpaaffilikkamik pineqaatissinneqarpoq. Unnerluutigineqartoq ukiumi ataatsimi Pineqaatissinneqarsimasunik Isumaginnittoqarfimmit nakkutigineqassaartaaq.

Unnerluutigineqartoq mitagaaneq pillugu unnerluussisussaatitaasunit piumasaqaatigineqartumut pinngitsuutinneqarpoq.

Suliap normua: K 176/20

Eqqartuussissutit nassuiaatillu