30 nov 2020
Nunatta Eqqartuussisuuneqarfia
Inuiaqatigiinni sulisitaassalluni pineqaatissinneqarneq - K 203/20
Angut 29-nik ukiulik Qeqqata Eqqartuussivianit unnerluunneqarpoq inooqatini persuttaramiuk, nujaartorlugu issuttuukkamiuk, niaqummillugu, natermullu igillugu niaqualu arlaleriarluni natermut anaarlussaallugu, aammalu quttoraatigut talerpikkut isummillugu.
Eqqartuussissut Nunatta Eqqartuussisuuneqarfianit oqaatigineqarpoq ulloq 30. november 2020.
Unnerluutigineqartoq Qeqqata Eqqartuussisoqarfiata eqqartuussutaani 15. september 2020-meersumi pinerluttulerinermi inatsisip § 88-ianik unioqqutitsinermut pisuutinneqarsimavoq, inooqatini niaqormissimallugu, natermut miloriussimallugu niaqualu natermut arlaleriarluni anarrussaassimallugu, taamatuttaaq uppataatigut talerperlikkut isimmissimallugu. Suliaq pineqaatissiissummik sivisussusiliinertut eqqartuussisuuneqarfimmi suliarineqarpoq.
Pineqaatissiissutissap sivisussusilerneqarnerani eqqartuussisuuneqarfiup nalilersuinerminut ilanngullugu tunngaviutippaa, unnerluutigineqartoq assingusumik pinerlunnermut siornatigut pineqaatissinneqartareersimasoq, meeqqani isersimasut inooqatiminut nakuusersimasoq pinerlineqartorlu annersaramiuk niaquatigut annersarsimagaa.
Eqqartuussisuuneqarfiulli aalajangersimasumik nalilersuereerluni eqqartuussisoqarfiup eqqartuussutaanik allannguinissamut tunngavissaqarsoraa, taamaalilluni unnerluutigineqartoq inuiaqatigiinni sulisitaasussanngortinneqarluni eqqartuunneqarpoq. Unnerluutigineqartup inuttut atugai pillugit paasissutissat eqqartuussisuuneqarfiup tamatumani annertuumik pingaartippai, taamatuttaaq paasissutissiissutigineqartut naapertorlugit unnerluutigineqartoq maannamut pissusilersortarnini kipitinniarlugu iliuuseqarsimanera pingaartinneqarput.
Pineqaatissiissut aalajangersarneqarpoq imaalillugu, unnerluutigineqartoq akunnerni 80-ini inuiaqatigiinni sulisitaasussaanngortinneqarluni, sivisunerpaamik qaammatit arfinillit iluini naammassineqartussamik. Aamma unnerluutigineqartoq Pinerluuteqarsimasunik Isumaginnittoqarfimmit ukiuni marlunni nakkutigineqassaaq, naleqq. pinerluttulerinermi inatsimmi § 141, imm. 1 aamma 2. unnerluutigineqartup eqqartuussaasarsimanera pillugu paasissutissat eqqarsaatigalugit piffissap nakkutigisaaffissap sulisussaatitaanerup qaangiunnerani ingerlaannarnissaa eqqornerusorineqarpoq.
Eqqartuussisoqarfiup eqqartuussutaa taamatut allannguuserlugu allanngortinneqarpoq.
Eqqartuussisoqarfiup eqqartuussutaa allanngortinneqarpoq imaalillugu, unnerluutigineqartoq Pinerluuteqarsimasunik Isumaginnittoqarfiup aalajangiinera naapertorlugu akunnerni 80-ini inuiaqatigiinni sulisitaassalluni, sivisunerpaamik qaammatit arfinillit iluini naammassineqatussamik. unnerluutigineqartoq Pinerluuteqarsimasunik Isumaginnittoqarfimmit ukiuni marlunni aamma nakkutigisaassaaq.
Suliap normua: K 203/20
Eqqartuussissutit nassuiaatillu