11 nov 2020
Nunatta Eqqartuussisuuneqarfia
Kannguttaatsuliorneq - K 156/20
Angut 53-nik ukiulik Qaasuitsup eqqartuussiavianit eqqartuunneqarpoq qaammatini arfinilinni Pineqaatissinneqarsimasinut inissiisarfimmiittussanngortinneqarpoq, taamanikkut niviarsiaraq quliniit 13-it tikillugit ukioqartoq kannguttaatsuliorfigisaramiuk.
Eqqartuussissut Nunatta Eqqartuussisuuneqarfianit oqaatigineqarpoq ulloq 11. november 2020.
Eqqartuussisuuneqarfiup eqqartuussisoqarfiup tunngavilersuutaat inerniliinerallu isumaqatigaat.
Eqqartuussisuuneqarfiup eqqartuussisoqarfittuulli isumaqarpoq, naangaassuteqanngitsumik unnerluutigineqartup nassuiaataanik qaangiiginnarsinnaaneq, niviarsiaqqap pineqartup nassuiaatai suliap aalajangiivineqarnissaani tunngavigineqassasut. Niviarsiaraq nammineerluni nassuiaavoq, apeqqutigineqartullu erngerluni eqqarsaqqaaranilu akisarpai. Nassuiaatai aalaakkaapput, sukumiillutillu ersaripput, tamaalillutik tutsuiginarluinnarlutik. Nassuiaataattaaq ilisimannittunit marlunnik qularnaarsisinneqarput.
Tamatuma kingorna eqqartuussisuuneqarfiup niviarsiaqqap nassuiaanera tunngavigaa, unnerluutigineqartoq arlaleriarluni piffissani aasami 2015-imiit december 2018-ip tungaanut niviarsiaraq iviangiisigut nuluisalu nalaasigut quttoraatigullu attuualaarsimagaani. Attuualaarinerit atisaasa qaavisigut iluatigullu pisarsimapput. Attuualaarinerit unnuami siniffimmi pisarsimapput, kisianni aamma ullukkut pisarsinnaasimallutik, niviarsiaraq sofami unnerluutigineqartup saniani issiagaangat. Pissutsit taamaannerini eqqartuussisuuneqarfik isumaqarpoq, uppernarsisinneqartoq kannguttaalliornerit pineqartut, qularnanngitsumik niviarsiaqqamut pineqartumut kanngutsisitsisimasut, eqqartuussisuuneqarfiup tamatuma kingorna eqqartuussisoqarfik isumaqatigaat, pinerluttulerinermik inatsimmi § 84, imm. 1 allaaserineqarneratut annertutigisumik unioqqutinneqarsimasoq.
Pineqaatissiissut eqqarsaatigalugu eqqartuussisuuneqarfiup pingaartippaa, piffissami ukiut pingasut missaanni kanngutaalliorfiginninnerit arlallit pineqarmata, niviarsiaqqap quliniik 13-inik ukioqalernissaata tungaanut. Eqqartuussisuuneqarfiuttaaq pingaartippaa, unnerluutigineqartup niviarsiaqqap arnaa najugaqatigimmagu, taamaammallu inuulluni tatigisariaqaraluangaa, niviarsiaqqamut sernersortaallunilu isumaginnittussaangaluartoq.
Tamatuma kingorna eqqartuussisoqarfiup eqqartuussutaa atuuttussanngortinneqarpoq.
niviarsiaqqap ukiui eqqarsaatigalugit, kannguttaalliornerit amerlassusaat kannguttaalliornerillu qanoq ittuussusai eqqarsaatingalugu eqqartuussisoqarfiup taarsiisussaanermut tunngatillugu eqqartuussutaa atuuttussanngortinneqarpoq.
Eqqartuussisoqarfiup eqqartuussutaa atuuttussanngortinneqarpoq.
Suliap normua: K 156/20
Eqqartuussissutit nassuiaatillu