02 nov 2020
Nunatta Eqqartuussisuuneqarfia
Qaammatini tallimani inissiisarfimmiittussanngortitsisoqarpoq - K 152/20
Angut 32-nik ukiulik anguteqartiminik kiinaatigut pingasoriarluni tilluisimasutut taassuminngalu naavisigut savimmik marloriarluni kapisisimasutut eqqartuunneqarpoq. Nakuuserneq ulloq 1. juli 2017-imi pisimavoq.
Pinerlineqartoq savimmik kapitinnermi kingunerisaanik nassami nalaatigut marlunnik itinngitsunik ikilerneqarpoq tamarmik immikkut 5 mm-isut angitigisunik, kiinnammigulli ajoquserneqarani.
Nakuusernerup annertussusaa suliallu suliarineqarnerani piffissaq atorneqartoq tunngavigalugit eqqartuussisoqarfiup angut 32-nik ukiulik taanna qaammatini tallimani inissiisarfimmiittussanngortissimavaa utaqqisitamik, ukiuni pingasuni misiligaaffiliinertalimmik.
Eqqartuussisoqarfiup eqqartuussutaa taanna unnerluussisussaatitaasunit suliareqqitassanngortinneqarpoq, piumasaqaatigineqarluni sukannernerusumik pineqaatissiipqarluni qaammatini arfineq-pingasuni inissiisarfimmiittussanngortitsisoqassasoq.
Angut 32-nik ukiulik piumasaqaateqarpoq sakkukinnerusumik pineqaatissiisoqassasoq, taamaattoqarsinnaanngippat eqqartuussisoqarfiup eqqartuussutaa atuuttussanngortinneqassasoq.
Eqqartuussisuuneqarfiup inerniliinera
Pineqaatissiissummik sivisussusiliineq taamaallaat eqqartuussisuuneqarfimmut suliareqqitassanngortinneqarpoq.
Eqqartuussisoqarfiup pineqaatissiissutigisimasaa eqqartuussisuuneqarfiup annertigut isumaqataaffigaa, taamaattorli misiligaaffiliussaq ukiumik ataatsimik sivikillisinneqarpoq, tamatumunngalu ingammik pissutaavoq eqqartuussisoqarfiup eqqartuussuteqarneraniit suliap eqqartuussisuuneqarfimmi aalajangiivigineqarnissaata tungaanut ukiup ataasingajaap ingerlasimanera.
Eqqartuussisuuneqarfiup pineqaatissiinermini pingaartippaa, savimmik atuisoqarluni sunngitsumut peqqarniitsumik nakuuserneq pillugu suliani pineqaatissiinermi sulisaaseq. Pinerlineqartup kiinaani ajoqusernernik takusaqartoqarsimannginnera eqqarsaatigalugu eqqartuussisuuneqarfiup tunngaviutippaa kiinnakkut tilluinerit sakkukitsuararsuusimasut.
Suliap sivisuumik suliarineqarsimanera pissutigalugu, unnerluutigineqartup pisuussutiginngisaanik, eqqartuussisoqarfiup pineqaatissiissummik utaqqisitanngortitsisimanera eqqartuussisuuneqarfiup isumaqatigaa.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 2. november 2020
Suliap normua: K 152/20
Eqqartuussissutit nassuiaatillu