Eqqartuussisoqarfiup eqqartuussutaa atuuttussanngortinneqarpoq - K 222/20

Eqqartuussissut Nunatta Eqqartuussisuuneqarfianit oqaatigineqarpoq ulloq 10. december 2020.

Unnerluutigineqartut Eqqartuussisoqarfik Sermersuumit eqqartuunneqarput ulloq 16. juli 2020 pinngitsuutinneqarlutik unioqqutitsinermut pinerluttulerinermi inatsimmi § 79 pisimasoq 1-mi meeqqamik kinguaassiutitigut atoqatiginninnermut. Taamatuttaaq unnerluutigineqartoq1 pisimasoq 2-mi pinngitsuutinneqarluni pisussaanani videokkut immiussisimanermut nammineq aamma unnerluutigineqartoq2 niviarsiaqqap atoqatiginninnerannik. Pisimasumilu tamatumani pisuutinneqarluni kannguttaatsuliorfiginninnermut aamma meeqqat pillugit pornografimik tigumiaqarnermut. Pisimasuni 3 aamma 4-mi unnerluutigineqartoq1 pisuutinneqarluni meeqqat pillugit pornografimik tigumiaqarnermut aamma pisortat oqartussaatitaannik narrunarsaarinermut.

Suliami pisimasut 1 aamma 2 nunatta eqqartuussisuuneqarfianit suliarineqarput uppernarsaasiilluni suliareqqitassanngortitatut, pisimasullu 3 aamma 4 taamaallaat sivisussusiliilluni suliareqqitassanngortitatut suliarineqarlutik.

Pisimasoq 1

Eqqartuussisoqarfiup tunngavilersuutigisimasai tunngavigalugit nunatta eqqartuussisuuneqarfiata isumaqatigivaa, unnerluutigineqartoq2-p pinngitsuutinneqarnera pinerluttulerinermi inatsimmi § 79-imi.

Kisiannili nunatta eqqartuussisuuneqarfia isumaqarluni, unnerluutigineqartoq1 niviarsiaqqap ukiunut atatillugu mianersuaalliorsimasoq, tassami nunatta eqqartuussisuuneqarfiata niviarsiaqqap nassuiaanera tunngavigalugu, arlaleriarluni pulaartarsimammagu, tassanilu periarfissaqarluarsimagaluarpoq ukiui ilisimassallugit. Tamatumunnga oqaatigineqassaaq assimi saqqummiunneqartumi 2016-meersumi ersarimmat niviarsiaraq qanoq inuusutsigisoq. Pissutsit arnaq issikkua aamma qanoq iliornera tamatumunnga allaassuteqarnerat allatut inerniliissutaasinnaanngillat.

Taamaalilluni unnerluutigineqartoq pisuutinneqarpoq eqqartuussisoqarfimmut unnerluutigineqarnermisut.

Pisimasoq 2

Eqqartuussisoqarfiup tunngavilersuutigisimasai tunngavigalugit nunatta eqqartuussisuuneqarfiata isumaqatigivaa, unnerluutigineqartup1 pinngitsuutinneqarnera pinerluttulerinermi inatsimmi § 94, stk. 1, nr. 4, aamma pisuutinneqarnera kannguttaatsuliorfiginninnermi aamma meeqqat pillugit pornografimik tigumiaqarsimanera.

Pisimasut 3 aamma 4

Pisimasut qulaani oqaatigineqartutut taamaallaat sivisussusiliilluni suliareqqitassanngortitatut suliarineqarput.

Isiginiarneqarlutik paasissutissat unnerluutigineqartup1 inuttut atugarisaanut tunngasut kiisalu paasissutissat tarnermigut qanoq inneraut tunngasut, taanna ersersinneqarpoq nalunaarusiami 7. oktober 2019-meersumi Dronning Ingrids Hospitalimiit, eqqartuussisoqarfiup pineqaatissiissutigalugu eqqartuussutaa atuuttussanngortinneqarpoq. Taamaattumik eqqartuussisuuneqarfiup qularnaatsumik isumaqarfiginngilaa, eqqartuussut qallunaat nunaanni tarnimikkut nappaatillit napparsimmavissuanni maannakkuugallartoq pisariaqartoq allanik pinerluuteqaqqinnginnissaa pinaveersimatinniarlugu. Tamatumunnga atatillugu eqqartuussisuuneqarfiup pingaartippaa, unnerluutigineqartoq juni 2020-mi angerlartinneqaramili ullut 14-ikkaarlugit A1-mut takkuttarsimammat tassani kapuut nakorsaatini piartorlugu, taamaattumillu unitsitsinngikkaluarluni katsorsagaanera nalilerneqarluni naammattoq.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, unnerluutigineqartoq aamma suliami pisimasoq 1-mi pisuutinneqartoq aammalu niviarsiaqqamut mitagaaneranut ajunngitsorsiassaanik akilissagai 20.000 kr.-it. 

Suliap normua: K 222/20

Eqqartuussissutit nassuiaatillu