Gå til sidens indhold

Nunatta Eqqartuussisuuneqarfia

09 dec 2020

Nunatta Eqqartuussisuuneqarfia

Nakuusersimanermut katsorsarneqarnissamik pineqaatissiissut - K 193/20

Angut 71-nik ukiulik Qeqqata Eqqartuussivianit pisuutinneqarpoq inummik allamik kiinaatigut arlaleriarluni isimmigarlugulu anaagamiuk. Eqqartuunneqarpoq Kalaallit Nunaanni napparsimmavimmi tarnimigut katsorsagassanngortinneqarnissaa.

Eqqartuussissut Nunatta Eqqartuussisuuneqarfianit oqaatigineqarpoq ulloq 9. december 2020.

Unnerluutigineqartup nammineerluni pisuunerarnera tunngavigalugu aamma suliami paasissutissat sanilliullugit, ilanngullugit assit saqqummiunneqartut peqqinnissaqarfiullu politiinut uppernarsaasiissutaa, eqqartuussisuuneqarfiup uppernarsarneqarsoraa unnerluutigineqartup pinerlineqartoq kiinaatigut marloriarlugu tillussimagaa kiisalu taanna natermi nalasoq ataasiarluni pukusuatigut tukersimagaa.

Maluginiarneqarpoq pinerlunneq unnerluussissummi pisimanerarneqartoq ulloq 27. december 2020. Unnerluutigineqartup tamanna pillugu nassuiaataa tunngavigalugu eqqartuussisuuneqarfiup tunngaviutippaa nakuuserneq 24. december 2020-mi pisimasoq, taamaattumillu unnerluutigineqartoq 24. december 2020-mi nakuusernermut pisuutinneqarpoq.

Eqqartuussisuuneqarfiup maluginiarpaattaaq isimmitsinerit marluk unnerluussissutigineqartut. Isimmitsinerup aappaa tukersineruvoq, tamatumunngalu unnerluutigineqartoq eqqartuunneqarpoq, isimmitsineraanerup aappaa uppernarsarneqanngimmat tamatumunnga pinngitsuutinneqarpoq.

Eqqartuussisoqarfiup pineqaatissiissummik aalajangersaasimanera eqqartuussisuuneqarfiup isumaqatigaa, imaalilluguli unnerluutigineqartoq isertitaminik aningaasaatiminillu atuisinnaanermik nakkutigisaanerup nalaani killilersuiffigineqassanani.

Eqqartuussisoqarfiup eqqartuussutaa atuuttussanngortinneqarpoq ima allannguuserlugu, unnerluutigineqartoq isertitanik, aningaasaatinik atuinissap tungaatigut killisersuiffigineqarnissaq aningaasatigullu pisussaaffinnik eqqortitsinissaq pillugit Pinerluuteqarsimasunik Isumaginnittoqarfiup aalajangersaaneranik malinnittussaatitaassanani. 

 

Suliap normua: K 193/20

Eqqartuussissutit nassuiaatillu