Gå til sidens indhold

Nunatta Eqqartuussisuuneqarfia

10 mar 2022

Nunatta Eqqartuussisuuneqarfia

Pineqaatissiissut allanngortinneqarani atuutsiinnarneqarpoq - K 121/20

Angut 32-nik ukiulik Sermersuup eqqartuussiivianit pisuutinneqarpoq pinngitsaaliilluni atoqateqarsimasoq, nakuusersimasoq, siorasaarisimasorlu, Kalaallit Nunaannilu Pineqaatissinneqarsimasunut inissiisarfimmiittussanngortinneqarnermik aalajangersimasumik sivisussuligaanngitsumik inissinneqarluni.

Eqqartuussissut Nunatta Eqqartuussisuuneqarfianit oqaatigineqarpoq ulloq 2. december 2020.

Nakorsaniit paasissutissat pigineqartut tunngavigalugit kiisalu eqqartuussap inassutigineqartutut ingiallorteqarluni suli aneersimannginnera pillugu paasissutissiissutigineqarmat, eqqornerusuusorineqarpoq Nunatta Eqqartuussisuuneqarfiata 3. februar 2014-imi pineqaatissiissutigisimasaa atuutsiinnarneqarpat, taamaattumillu eqqartuussisoqarfiup tamanna pillugu aalajangiisimanera eqqartuussisuuneqarfiup isumaqatigisinnaavaa. Eqqartuussisuuneqarfiup aalajangiinermini annertuumik pingaartippai pinerluutigineqarsimasut qanoq ittuunerat aamma eqqartuussap kinaassutsimigut ajoquteqarnera kiisalu maannakorpiaq nalilerneqarsinnaanngimmat taanna kiffaanngissuseqarnerujartuaarnerminut atatillugu qanoq qisuariassanersoq, tassami iperagaajartuaartitsinivimmik aallartitsisoqarsimanngilaq. Tamatuma saniatigut eqqartuussisuuneqarfiup nalilersuinermini ilanngullugu tunngaviutippaa, eqqartuussaq sammisassaq pillugu erseqqissumik isumaqatigineqarluni pilersaarusioqatigineqarpat nakkutigilluarneqarpallu aatsaat pinerloqqissinnaanerup navianartoqarnera annikitsutut nalilerneqarsinnaasoq.

Eqqartuussisuuneqarfiup naliliinermini pingaartippaattaaq tarnikkut peqqissartinneq, eqqartuussap nammineq iluaqutigineragaa, taamaatiinnarneqarsimasoq, katsorsaanerullu qaqugu aallarteqqinnissaa maannakkut erseqqissumik oqaatigineqarsinnaanngitsoq aammami paasissutissiissutigineqartut malillugit katsorsartinneq pinerloqqinnginnissamik pinngitsortitsiniarnermut inissinneqarnerullu ingerlaneranut pingaaruteqarpasimmat.

Eqqartuussap misiligummik iperagaatitsinissamut piumasaqaatigineqartutut imigassamik atornerluinermut allatullu atornerluinermut katsorsartikkusussinnaanera allatut inerniliinermik kinguneqarsinnaanngilaq.

Iperagaatitsinissaq, tamakkiisumik misiligummilluunniit, maannakkorpiaq tunngavissaqanngimmat pineqaatissiissut allanngortinneqarani atuutsiinnarneqarpoq.

Nunatta Eqqartuussisuuneqarfiata ulloq 3. februar 2014-imi pineqaatissiissutaa allanngortinneqarani atuutsiinnarneqassaaq.

 

Suliap normua: K 121/20

Eqqartuussissutit nassuiaatillu