09 okt 2020
Nunatta Eqqartuussisuuneqarfia
Suliami hashimut tunngasumi - K 272/19 aamma K 295/19
Angut arnallu marluk Eqqartuussisoqarfik Sermersuumit marloriarluni Danmarkimiit Kalaallit Nunaannut hashimik eqqussisimasutut, hashimik nammineq atugassaminnik paarisaqarsimasutut kiisalu tuniniaaqqinnissaq siunertaralugu ikiaroornartulerisimasutut eqqartuunneqarput.
Taakkunani marluk ukiuni pingasuni pineqaatissinneqarsimasunut inissiisarfimmiittussanngorlugit eqqartuunneqarput matumani hashi katillugit 3.061,28 gramminik oqimaassusilik eqqussimammassuk. Unnerluutigineqartumut kingullermut tunngatillugu pineqaatissiissutip atuuttussanngortinneqarnissaa kinguartinneqarpoq inuttut atugarisai pillugit paasissutissat utaqqineqaqqaassammata.
Eqqartuussisuuneqarfiup inerniliinera
Eqqartuussisuuneqarfiup taakku pingasut tamarmiutillugit unnerluussummi pisimasumi 1-mi 5-milu nassuiaatigineqartut naapertorlugit hashimik 5.453 gramminit oqimaannerunngitsumik eqqusseqataasimasutut pisuutippai. Pisimasumi 5-mi eqqartuussisuuneqarfiup taakku pingasut tamarmiutillugit isumaqatigiillutik hashimik 304 grammimik eqqussisimasutut pisuutippai. Pisimasumi 6-mi pingasuullutik hashimik 991 grammimik eqqusseqataasimasutut pisuutinneqarput. Pisimasumi 7-mi tamarmik pingasuullutik isumaqatigiinnikkut marloriarlutik allakkatigut nassiussuinikkut hashimik 400 grammimik eqqussisimasutut pisuutinneqarput. Pisimasumi 8-mi T2 pineqaatissinneqarsimasunut inissiisarfimmi tigummigallagaarnermi nalaani hashimik 4,28 grammimik nammineq atugassaminik paarisaqarsimasutut eqqartuunneqarpoq.
T1-mut T2-mullu pineqaatissiissutit ukiuni pingasuni qaammatinilu arfinilinni pineqaatissinneqarsimasunut inissiisarfimmiittussanngortitsinertut aalajangersarneqarput. Matumani ataatsimoorussamik pineqaatissiissut pinerluttulerinermi inatsimmi § 150, 1. naapertorlugu pineqarpoq, tassa imaappoq Eqqartuussisoqarfik Sermersuup eqqartuussutaani ulloq 16. november 2016-meersumi misiliummik iperagaanerup kingorna pineqaatissiinermut piffissaq sinneruttoq.
T3-mut pineqaatissiissut ukiuni marlunni qaammatinilu arfinilinni pineqaatissinneqarsimasunut inissiisarfimmiittussanngortitsinertut aalajangersarneqarpoq. Eqqartuussiviup eqqartuussutaa arsaarinninnermut tunngasoq atuuttussanngortinneqarpoq allannguutitut haship arsaarinnissutigineqartup 4,28 grammitaa T2-mit arsaarinnissutigineqassalluni. Unnerluutigineqartut suliamik suliarinninnernut tamanut aningaasartuutit akilissavaat.
Aalajangiinerup ullua
Eqqartuussut Nunatta Eqqartuussisuuneqarfianit oqaatigineqarpoq ulloq 21. april 2020.
Suliap normua: K 272/19 aamma K 295/19
Eqqartuussissutit nassuiaatillu