Gå til sidens indhold

Nunatta Eqqartuussisuuneqarfia

15 dec 2020

Nunatta Eqqartuussisuuneqarfia

Ernguttamut tiinganiarneq pillugu suliami eqqartuussut - K 077/20

Angut 55-inik ukiulik ernguttami kinguaassiuutaanik atisaasa qaavisigut attuuannissimasutut Qaasuitsup Eqqartuussisoqarfianit kannguttaalliorfiginninnermut eqqartuunneqarluni qaammatini pingasuni inissiisarfimmiittussanngortinneqarpoq utaqqisitamik.

Tamatumunnga atatillugu mitagaanermut taarsiissutinik kr. 5.000-inik taassumunnga akiliisussanngortinneqarpoq. Eqqartuussisoqarfiup uppernarsarneqarsimasorinngilaa unnerluutigineqartup inussani ernguttami utsuinut mangussimagai aamma uppernarsarneqarsimasorineqanngilaq usuni ernguttaminut tissassartissimagaa, taamaattumillu pinerluttulerinermi inatsisip § 79-ianik, meeqqamut 15-it inorlugit ukiulimmut tiinganeq, unioqqutitsinermut pinngitsuutinneqarpoq. Eqqartuussisoqarfiup naliliinermini annertuumik pingaartippaa politiip killisiuisup apeqqutaasa qanoq ittuunerat, isumaqarporlu killisiuisup pinerlineqartoq oqaasissiorsimagaa. 

 Eqqartuussisuuneqarfiup inerniliinera

Pinerlineqartup nassuiaataa toqqammavigalugu eqqartuussisuuneqarfiup tunngaviutippaa unnerluutigineqartup ernguttani minnerpaamik tallimariarluni kinguaassiuutaatigut atornerlussimagaa, arlaleriarlunilu usuni niviarsiaqqap utsuisa qaavaniitittarsimagaa qummuttarlunilu, atoqatigiinnermisulli aalalluni. Eqqartuussisuuneqarfiup uppernarsarneqarsorinngilaa unnerluutigineqartup inussani ernguttami utsuinut mangussimagai, tamatuminngalu unnerluussuteqarnermut pinngitsuutippaa. Atornerluinerit qanoq ittuuneri amerlassusaalu kiisalu ilaqutariinnikkut qanittumik atassuteqarneq eqqarsaatigalugit eqqartuussisuuneqarfiup pineqaatissiissut qaammatini qulingiluani inissiisarfimmiittussanngortitsinermut aalajangersarpaa. Mitagaanermut taarsiissutit aamma kr. 60.000-inut qaffanneqarput.

Ulloq aalajangiiffiusoq

Eqqartuussut Nunatta Eqqartuussisuuneqarfianit oqaatigineqarpoq ulloq 15. maj 2020

Suliap normua: K 077/20

Eqqartuussissutit nassuiaatillu