03 sep 2020
Nunatta Eqqartuussisuuneqarfia
Peqqarniitsumik nakuuserneq pillugu eqqartuussut - K 013/20
Arnaq 28-nik ukiulik Qeqqata Eqqartuussivianit eqqartuunneqarpoq inissiisarfimmut inissinneqarnermik ulluni 60-ini inooqatini savimmik naavatigut kapisimammagu. Angut pisimasup kinguneranik inalukkamigut sisamanik ajoquserneqarsimavoq.
Arnap suliaq eqqartuussisuuneqarfimmut suliareqqitassanngortippaa, kissaatigigamiuk suliami pinngitsuutitaanissani. Arnap nammineq inooqataataluunniit pisup qanoq ingerlasimanera eqqaamanngilaat.
Eqqartuussisuuneqarfiup inerniliinera
Ilisimannittut nassuiaat oqaaseqaatillu suliami peqataasut pisup kinguninngua oqaatigisimasaat, sanilliullugillu nakorsanit paasissutissat, tunngavigalugit, eqqartuussisuuneqarfiup eqqartuussivik isumaqatigaa, unnerluussisussaatitaasut uppernarsaraat, arnaq unnerluutigineqarnerminut pisuusoq.
Savimmik kapisineq, ilungersunartunik ajoqusernermik kinguneqartitsisoq, nakuuserneruvoq peqqarniitsorujussuaq, nalinginnaasumillu tamanna pillugu pineqaatissiiffigineqartarpoq utaqqisitaanngitsumik inissiisarfimmut piffissami sivisunerusumi inissinneqarnermik. Inatsisinilli unioqqutitsineq pisimavoq eqqartuussisuuneqarfimmit suliarineqarnissaa ukiup aappaa sinnerlugu sioqqullugu, suliallu taama sivisutigisumik suliarineqarneranut arnap pissuserisaanik pissuteqanngilaq. Tamatuma saniatigut arnaq panissaarsimavoq, tassungalu arnaq pingaarnertut isumaginnittuuvoq, aammalu tamatigut inuttut atukkani pitsanngortissimavai. Pissutsit taakku immikkut ittut toqqammavigalugit eqqartuussisuuneqarfiup pineqaatissiissutissatut aalajangerpaa taassaassasoq inuiaqatigiinni sulisitaanermut nalunaaquttap akunnerini 120-ni piffissamik sivisunerpaaffilerlugu ukiup aappaata affaanik aamma pinerluttunik isumaginnittoqarfimmit nakkutigisaanermit ukiuni marlunni.
Aalajangiinerup ullua
Eqqartuussut Nunatta Eqqartuussisuuneqarfianit oqaatigineqarpoq ulloq 28. maaji 2020
Suliap normua: K 013/20
Eqqartuussutit nassuiaatillu