Gå til sidens indhold

Nunatta Eqqartuussisuuneqarfia

18 mai 2020

Nunatta Eqqartuussisuuneqarfia

Pineqaatissinneqarsimasunut inissiisarfimmiittussanngortitsineq - K 079/20

Angut 51-nik ukiulik Eqqartuussisoqarfik Qaasuitsumit sisamariarluni ikiaroornartumik ingerlatitseqqiisimanermut pisuutinneqarpoq. Eqqartuussiviup unnerluutigineqartup tuniniaanermi tunuliaqutitut inissisimasinera tunngavilersuutigaa.

Pineqaatissiissut qaammatini arfinilinni pinngitsoorani inissiisarfimmiittussanngortitsinertut aalajangersarneqarpoq matumani suliap suliarineqarnerani piffissaq sivisooq atorneqartoq eqqarsaatigineqarluni.

Eqqartuussiviup eqqartuussutaa unnerluutigineqartumit suliareqqitassanngortinneqarpoq pinngitsuutinneqarnissamik tullertullu sakkukillisaavigineqarnissamik piumasaqaatitalerlugu.

Eqqartuussisuuneqarfiup inerniliinera

Unnerluutigineqartoq pinngitsuunerarpoq nassuiaallunilu aningaasat nassaarineqarsimasut ileqqaakkaneersuusut. Unnerluutigineqartup angerlarsimaffiani digitalimik oqimaalutaavimmut nassaarineqarsimasumut hashimillu takussutissartalimmut ilaatigut tunngatillugu eqqartuussisuuneqarfiup tunngavilersuutigaa aningaasat kontoanut nuunneqarsimasut aningaasallu angerlarsimaffiani nassaarineqarsimasut hashimik tuniniaanermeersuusut. Tamanna tunngavigalugu unnerluutigineqartoq hashimik ingerlatitseqqiinermut unnerluussut naapertorlugu pisuutinneqarpoq. 

Pineqaatissiissut ataatsimoorussamik pineqaatissiissutitut aalajangersarneqarpoq siornatigut assingusumik pinerluuteqarsimanermut eqqartuussut qaammatini arfinilinni pineqaatissinneqarsimasunut inissiisarfimmiittussanngortitsineq ilanngunneqarluni. Suliap suliarineqarneranut piffissaq sivisooq atorneqartoq eqqarsaatigalugu inissiineq utaqqisitanngortinneqarpoq ukiunik marlunnik misilinneqarfilerlugu. Unnerluutigineqartoq tamatuma saniatigut ilassutitut akiligassinneqarpoq 36.000 kr.-nik. Piffissaq atorneqartoq eqqarsaatigalugu eqqartuussisuuneqarfiup suliami aningaasartuutai naalagaaffiup karsianit akilerneqassapput.

Aalajangiinerup ullua

Eqqartuussut Nunatta Eqqartuussisuuneqarfianit oqaatigineqarpoq ulloq 18. maj 2020.

Suliap normua: K 079/20

Eqqartuussissutit nassuiaatillu