Gå til sidens indhold

Nunatta Eqqartuussisuuneqarfia

11 mai 2020

Nunatta Eqqartuussisuuneqarfia

Sakkulersorluni nakuuserneq pillugu suliami eqqartuussut - K 060/20

Arnaq 28-nik ukiulik nakuusernermut kiisalu nakuuseriarnermut Qaasuitsup Eqqartuussisoqarfianit pisuutinneqarpoq. Taassuma angut, unnerluutigineqartumik pisoq sioqqullugu nujaartuisimasoq, immiaaqqap puuanik miloriarsimavaa, miloriakkanili eqqornagu alla eqqorsimallugu.

Eqqartuussisoqarfiup pineqaatissiissut ulluni 60-ini inissiisarfimmiittussanngortitsinermut aalajangersarpaa, ukiumi ataatsimi misiligaaffiliinertalimmik utaqqisitanngortinneqartumik.

Eqqartuussisuuneqarfiup inerniliinera

Eqqartuussisoqarfiup pisuunermut tunngatillugu apeqqut pillugu aalajangiinera eqqartuussisuuneqarfiup atuuttussanngortippaa oqaatigalugulu unnerluutigineqartup allamik, miloriakkaminiunngitsoq, milorsisinnaanini ilisimagisinnaasimassagaa, tassami inuit arlallit ataatsimoorlutik nikorfasimapput. Eqqartuussisuuneqarfiup oqaatigaa sakkulersorluni nakuuserneq pillugu suliani pineqaatissiissut aallaaviusumik tassaasartoq pinngitsoorani inissiisarfimmiittussanngortitsineq. Piffissaq suliap suliarineqarneranut atorneqartoq ukiut sisamat sinnerlugit sivisussuseqartoq unnerluutigineqartullu inuttut atugai ajunngilluinnartut eqqarsaatigalugit eqqartuussisuuneqarfiup pineqaatissiissut kr. 2.000-inik akiligassiinermut aalajangersarpaa.

Ulloq aalajangiiffiusoq

Eqqartuussut Nunatta Eqqartuussisuuneqarfianit oqaatigineqarpoq ulloq 11. maj 2020

Suliap normua: K 060/20

Nunatta Eqqartuussisuuneqarfiata eqqartuussutaa

Qaasuitsup eqqartuussiviata eqqartuussutaa

Nassuiaat