13 jun 2022
Nunatta Eqqartuussisuuneqarfia
Peqqarniitsumik nakuusersimanermut suliami eqqartuussut - K 089/20
Angut 24-nik ukiulik Qeqqata Eqqartuussivianit eqqartuuneqarpoq inissiisarfimmut inissinneqarnermik allat marluk ilagalugit angut alla niaquatigut arfinileriarlugu-arfineq-pingasoriarlugu isimmittarsimagamikku.
Niaquatigut puiaasamik anaallugu kiinaatigullu arlaleriarlugu tilluttarsimallugu. Pinerluttuliornermi eqqugaasoq arlalinnik ajoquserneqarsimavoq, ilaatigut isilerfiata saarnga napisimalluni. Pilertortumik Dronning Ingridip Napparsimmavissuanut nuutinneqarsimavoq.
Nakuuserneq piliarineqarsimavoq unnerluutigisap siusinnerusukkut nakuusernermut eqqartuussutip kinguneranik misiligaaffiusup iluani. Pineqaatissiissutip sinnera naammassineqanngitsoq siusinnerusukkut eqqartuussummeersoq tassaapput ullut 121-t.
Unnerluutigisap suliaq eqqartuussisuuneqarfimmut suliareqqitassanngortissimavaa, kissaatigigamiuk suliami pinngitsuutitaanissani.
Atassuteqarluni paasissutissiineq
Annertunerusumik paasissutissanik piniaraanni imaluunniit eqqartuussutip tamakkiisup assilinera piniaraanni atassuteqarfigineqarsinnaavoq Nunatta Eqqartuussisuuneqarfia.
Eqqartuussisuuneqarfiup inerniliinera
Nassuiaatigineqartut tunngavigalugit, eqqartuussisuuneqarfiup eqqartuussivik isumaqatigaa, unnerluussisussaatitaasut uppernarsisimagaat, unnerluutigisaq unnerluutigineqarnerminut pisuusoq.
Peqqarniitsumik nakuuserneq, sakkumik atortoqarluni soorlu puiaasamik, aammalu ilungersunartunik ajoqusernernik kinguneqartoq, pinerluttulerinermi inatsimmik unioqqutitsineruvoq ilungersunartoq, aammalu nalinginnaasumik tamanna kinguneqartinneqartarpoq utaqqisitaanngitrsumik inissiisarfimmut sivisunerusumik inissinneqarnermi. Suliami matumani sakkortulisaatitut isigineqarpoq, kamassaarneqarani nakuusersimaneq, arlalinnit peqatigiilluni piliarineqarsimasoq, unnerluutigisarlu nakuusernermut peqataasimasoq siusinnerusukkut nakuusernermut eqqartuussaareernermi kingorna misiligummik iperagaanermi nalaani, sulilu misiligut ingerlatillugu. Eqqartuussisuuneqarfiup eqqartuussiviup eqqartuussutaa inissiisarfimmut inissinneqarneq ukiumi ataatsimi atortussanngortippaa. Pineqaatissiissummut ilaanngilaq pineqaatissiissutaasimasup sinnera suli naammassineqanngitsoq siusinnerusukkut nakuusernermut eqqartuussummiittoq.
Aalajangiinerup ullua
Eqqartuussut oqaatigineqarpoq Nunatta Eqqartuussisuuneqarfianit ulloq 1. juuni 2020
Suliap normua: K 089/20
Eqqartuussissutit nassuiaanerillu