Gå til sidens indhold

Nunatta Eqqartuussisuuneqarfia

10 jul 2020

Nunatta Eqqartuussisuuneqarfia

Suliami nakuusenermut tunngasumi eqqartuussut - K 253/19

Angut 42-nik ukiulik Qeqqata Eqqartuussivianit eqqartuunneqarpoq utaqqisitamik inissiisarfimmut inissinneqarnermik ulluni 60-ni.

Pineqaatissiissutip naammassitinneqarnissaa kinguartinneqarpoq piffissarlu misiliiffiusoq ukiumik ataatsimik sivisussuseqartoq qaangiuppat atorunnaassalluni, unnerluutigisaq piffissap misiliiffiusup iluani inatsisinik unioqqutitseqqinngippat. Unnerluutigisaq eqqartuussaavoq pinerlisaq arlaleriarlugu kiinaatigut tilluttarsimagamiuk aamma toqqusassisimallugu.

Eqqartuussiviup eqqartuussutaa unnerluussisussaatitaasunit suliareqqitassanngortinneqarpoq piumasaqaatigalugu unnerluutigisaq sakkortunerusumik pineqaatissinneqassasoq.

Eqqartuussisuuneqarfiup inerniliinera

Eqqartuussisuuneqarfiup unnerluussisussaatitaasut isumaqatigai, pinerluttulerinermik inatsimmik unioqqutitsineq peqarniitsuummat, taamaattunullu pineqaatissiissutigineqartariaqaraluarpoq utaqqisitaanngitsumik inissiisarfimmut inissinneqarnermik. Tamatuma saniatigut aamma sakkortulisaatitut isigisariaqarpoq, unnerluutigisaq siusinnerusukkut eqqartuussaasimammat sivisunerusumik inissiisarfimmut inissinneqarnermik arlaleriarluni inummut ulorianartumik pinerluuteqarsimanera.

Sakkukinnerusumik pineqaatissiinissamut eqqartuussisuuneqarfiup pingaartutut isigaa, inatsisinik unioqqutitsinermiit ukiut marlungajaat ingerlareersimanerat eqqartuussisuuneqarfiup suliamik suliarinninnilernissaanut. Piffissaq taama sivisutigisoq suliap suliarineqarneranut unnerluutigisaq pisuunngilaq. Eqqartuussisuuneqarfiup aamma pingaartutut isigaa, unnerluutigisap meeraanermini misigisani sakkortuut qaangiiviginiarlugit annertuumik suliniuteqarsimammat, aammalu inuttut atugai pitsaasuusut, suliaq eqqartuussisuuneqarfimmi suliarineqarmat. Tamatuma kingorna aalajangerneqarpoq pineqaatissiissut tassaassoq inuiaqatigiinni sulisitaaneq nalunaquttap akunnerini 80-ini, taakkulu naammassineqareersimassasut piffissap sivisunerpaaffiusup qaammatinik arfineq-pingasunik sivisussuseqartup ilunani aamma pinerluttunik isumaginnittoqarfimmit nakkutigineqassasoq ukiumi ataatsimi qaammatinilu arfinilinni.

Aalajangiinerup ullua

Eqqartuussut Nunatta Eqqartuussisuuneqarfianit oqaatigineqarpoq ulloq 30. juuni 2020

Suliap normua: K 253/19

Eqqartuussissutit nassuiaatillu