Qaammatini pingasuni inissiisarfimmiittussanngortitsineq - K 016/20

Eqqartuussissut Nunatta Eqqartuussisuuneqarfianit oqaatigineqarpoq ulloq 23. juli 2020.

Unnerluutigineqartoq eqqartuussaasimavoq qamutinik motorilinnik ingerlatitsisimasutut ulloq 21. juuli 2018 aani imigassamik 1,20 promillemik annertunerusumik akulik. Tamatuma saniatigut eqqartuussaasimavoq 12-inik ukiulik niviarsiaraq tallimanik ikinnerunngitsunik atoqatigisimalluni 20. juulimiit 30. septemberimut 2018, naak nalunngikkaluarlugu 15-it inorlugit ukioqartoq.

Suliami matumani eqqartuussiviup eqqartuussutaata kingorna unnerluutigineqartoq ulloq 1. apriili 2020 akiliisitsiniut akueraa aamma ingerlatitsisinnaajunnaarsitaaneq utaqqisitaq ukiunik pingasunik misiligaaffilik.

Unnerluutigineqartup imminut pineqaatissiissutigineqartoq, akuerisani ulloq 1. apriili 2020, suli naammassisimanngimmagu, aammalu tamatumani pineqarmat pinerluut assingusoq eqqartuussisuuneqarfik isumaqarpoq, ataatsimoortumik pineqaatissiissummik aalajangersaasoqartariaqartoq unioqqutitsineq ilaatinneqartoq akuersinermi ulloq 1. apriili 2020-mi aammalju uani suliami unioqqutitsineq pillugu, pinerluttulerinermi inatsisip §-iisa 124-ani, oqaaseqatigiit tulliit, toqqammavigalugit.

Periuseq atuuttoq malillugu imigassartorsimalluni ingerlatitsinermut tunngasoq pineqaatissiissutaasoq allanngortinneqarpoq, soorlu eqqartuussiviup ataatsimoortumik pineqaatissiissutissatut aalajangigaa imigassartorsimalluni ingerlatitsinermut februaarimi 2020-mi aamma imigassartorsimalluni ingerlatitsisimasutut suliami matumani ataatsimoortumik akiliisitsissummut annertussuseqartumut 5.800 koruuninut aamma ingerlatitsisinnaajunnaarsitaanermut ukiuni marlunni qaammatinilu arfinilinni.

Eqqarsaatigalugu, niviarsiaraq aatsaat aqqaneq-marlunnik ukioqaleqqammersoq unnerluutigineqartumik atoqatiginnittarneri pimmata, atoqatigiinnerillu arlaliummata, taakkulu ingerlatiinnarneqarlutik niviarsiaqqap arnaata unnerluutigineqartoq qinnuigimmagu tamakku unitsissagai, unnerluutigineqartullu niviarsiaraq tunillassimammagu nappaatipalaamik eqqartuussisuuneqarfik isumaqarpoq, pineqaatissiissut aalajangerneqartariaqartoq utaqqisitaanngitsumik inissiisarfimmut inissinneqarnermik qaammatini pingasuni, pinerluttulerinermi inatsisisip §-iisa 79-iat, §-iisalu 146-at aamma 147-at, toqqammavigalugit.

Taamaalinermi eqqarsaatigineqareerpoq, piffissaq suliap suliarineqarneranut atorneqartoq sivisunerusimammat, tamatumanilu aamma unnerluutigineqartoq ilaatigut pisuulluni, eqqartuussineq siusinnerusukkut ingerlanniarneqarsimagaluarmat, iluatsinngitsumilli, unnerluutigineqartoq kilisaammi aalisarmat. Aamma ilanngullugu pingaartutut isigineqarpoq, unnerluutigineqartoq suliap paasineqarnissaanut suleqataasimanera.

Naak, suliami paasissutissat malillugit toqqammaviusariaqaraluartoq, uani arnaatigiinnermut/angutaatigiinnermut assingusumik pissuseqartoqarsimagaluartoq eqqartuussisuuneqarfik isumaqarpoq, unnerluutigineqartup 10.000 koruunit akilissagai mitagaasimanermut taarsiissutitut niviarsiaqqamut. Eqqartuussisuuneqarfiup ingammik pingaartutut isigaa, unnerluutigineqartup niviarsiaraq nappaatipalaamik tunillassimammagu, tamannalu taama inuusuttigisumut immikkut innarliinertut isigisariaqarpoq.

Unnerluutigineqartoq eqqartuunneqarpoq utaqqisitaanngitsumik inissiisarfimmut inissinneqarnermik qaammatinik pingasunik sivisussusilimmik eqqartuunneqarpoq, akiliisitsissut annertussuseqartoq 5.800 koruuninik kiisalu utaqqisitaanngitsumik ingerlatitsisinnaajunnaarsitaalluni ukiuni marlunni qaammatinilu arfinilinni.

Unnerluutigineqartup mitagaasimanermut taarsiiffigissavaa niviarsiaraq 10.000 koruuninik.

Suliap normua: K 016/20

Eqqartuussissutit nassuiaatillu