18 aug 2020
Nunatta Eqqartuussisuuneqarfia
Pineqaatissinneqarsimasunut inissiisarfimmiittussanngortitaaneq - K 101/20
Angut 38-nik ukiulik Eqqartuussisoqarfik Qaasuitsumit hashimik 0,12 grammimik paarisaqarsimasutut pisuutinneqarpoq, hashilu isertitsiviup misissorneqarneranut atatillugu nassaarineqarsimavoq.
Ilanngullugu arlaleriarluni nakuusersimasutut kiisalu nipituumik sakkortuumillu pissusilersorsimasutut pisuutinneqarpoq. Matumunnga qaammatini tallimani pineqaatissinneqarsimasunut inissiisarfimmiittussanngorlugu eqqartuuneqarpoq ilassutitullu 6.000 kr.-nik akiligassinneqarluni.
Eqqartuussiviup eqqartuussutaa unnerluutigineqartumit suliareqqitassanngortinneqarpoq pineqaatissiissutip utaqqisitanngortinneqarnissaanik kiisalu akiligassiissutip atorunnaarnissaanik piumasaqaatitalerlugu.
Eqqartuussisuuneqarfiup inerniliinera
Suliaq eqqartuussisuuneqarfimmit sivisussusiliinermik suliareqqitassanngortitatut suliarineqarpoq. Eqqartuussisuuneqarfiup eqqartuussiviup pineqaatissiissummik sivisussusiliinera isumaqatigaa, ilaatigullu unnerluutigineqartup pineqaatissinneqarsimasunut inissiisarfimmit aneqqammernermi kingorna qaammat ataaseq qaangiutiinnartoq nukersorsimanera tunngavilersuutigalugu, matumanilu siornatigut aapparisimasaminut nukersorsimasutut eqqartuunneqarsimanini pillugu pineqaatissinneqarnerminik atuereerluni aneqqammersimalluni. Suliap suliarineqarnerani piffissap atorneqartup ukiunik sisamanik sivisussusillip nalinginnaanngitsumik sivisunerujussua eqqarsaatigalugu eqqartuussisuuneqarfiup nalilerpaa, pineqaatissiissut utaqqisitanngortinneqartariaqartoq ukiumi ataatsimi misilinneqarfimmik piumasaqaatitalerlugu. Pisimasut ilaasa nutaajunerunerat allatut inerneqartitsisinnaanngilaq. Unnerluussisussaatitaasullu ilanngullugu akiligassiissutip atorunnaarsinnissaanik piumasaqaateqarnerat eqqarsaatigissagaanni, eqqartuussisuuneqarfiup aalajangerpaa ilassutitut akiligassiissut atorunnaarsinneqassasoq.
Aalajangiinerup ullua
Eqqartuussut Nunatta Eqqartuussisuuneqarfianit oqaatigineqarpoq ulloq 18. august 2020.
Suliap normua: K 101/20