Gå til sidens indhold

Nunatta Eqqartuussisuuneqarfia

18 sep 2020

Nunatta Eqqartuussisuuneqarfia

Suliami unioqqutitsilluni piniarnermut tunngasumi eqqartuussut - K 104/20

Angutit marluk Eqqartuussisoqarfik Qaasuitsumit tamarmik immikkut 5.000 kr.-nik akiligassinneqarput,

namminersorlutik oqartussat nalunaarutaanni nr. 3 ulloq 27. januar 2017-meersumi qilalukkanik qaqortanik qernertanillu illersuinermut piniarnermullu inatsimmi § 7 unioqqutissimammassuk, matumani qilalukkamik qaqortamik pisaqarsimammata pisarialimmik akuersissuteqaqqaaratik. Unnerluutigineqartut pingajuat matumunnga pinngitsuutinneqarpoq piffissami pisaqarnerup nalaani akuersissuteqarsimagami.

Eqqartuussiviup eqqartuussutaa unnerluutigineqartunit aalajangeqqitassanngortinneqarpoq pinngitsuutinneqarnissamik piumasaqaatitalerlugu.

Eqqartuussisuuneqarfiup inerniliinera

Eqqartuussisuuneqarfiup uppernarsaasiinerup kingorna tunngavilersuutigaa unnerluutigineqartut ataatsimoorlutik piniariarsimanerat, tassungalu atatillugu qilalukkamik qaqortamik pisaqarsimanerat. Peqataasoq ataaseq qilalugarnissamut akuersissuteqarsimavoq nalunaaruteqarnermilu immersugassaq immersorsimavaa, matumani allassimalluni unnerluutigineqartut marluk piniarnermut peqataasimasut. Eqqartuussisuuneqarfiup unnerluutigineqartut pinngitsuutippai maluginiaqqullugulu nalunaarummi § 8-mi taaneqartutut unnerluutigineqartut ataatsimoortumik akuersissuteqarsimanngitsut, tamannalu allatut inerniliinermik kinguneqarsinnaanngitsoq, peqqutigalugu eqqartuussisuuneqarfiup tunngavilersuutigimmagu pisaqarneq aatsaat unioqqutitsinerussasoq nalunaaruteqartoq pisarialimmik akuersissuteqarsimanngippat.

Unnerluutigineqartut tamatuma kingorna pinngitsuutinneqarput. 

Ulloq aalajangiiffiusoq

Eqqartuussut Nunatta Eqqartuussisuuneqarfianit oqaatigineqarpoq ulloq 20 august 2020.

Suliap normua: K 104/20

Eqqartuussissutit nassuiaatillu