02 feb 2021
Nunatta Eqqartuussisuuneqarfia
Paarisassanngortitsisoqarluni eqqartuussut atuutsiinnarneqartoq - K 297/19
Angut 29-nik ukiulik arlalippassuariarluni nakuusersimasutut, tillissimasutut aserorterisimasutullu Qeqqata Eqqartuussisoqarfianit eqqartuunneqarluni immikkut paarisassanngortinneqarnikuuvoq.
Unnerluutigineqartoq assingusumik pinerlussimanermut annikigisassaanngitsunut siornatigut pineqaatissinneqartareerpoq. Eqqartuussaq misiligummik iperagaanissamik Eqqartuussisoqarfimmut piumasaqaateqarsimavoq. Eqqartuussisoqarfiup pineqaatissiissut atuutsiinnarsimavaa, misiligummik iperagaatitsinissamut tunngavissaqannginnera tunngavilersuutigalugu.
Eqqartuussap aalajangiineq taanna eqqartuussisuuneqarfimmut aalajangeqqitassanngortippaa.
Eqqartuussisuuneqarfiup inerniliinera
Eqqartuussisuuneqarfiup aalajangiinermini annertuumik pingaartippai eqqartuussap hashimik atornerluinera pillugu paasissutissat aamma inunnut navianaatilimmik pinerloqqinnissamut aalerinartoqarnera pillugu paasissutissat, siornatigut pinerluutaasarsimasunut sanilliullugit, isumaqarporlu eqqartuussaq allanut ima navianaateqartigimmat misiligummik iperagaatitsinissamut tunngavissaqartoqanngitsoq. Aamma eqqartuussamik iperagaajartuaartitsisoqarluni suli aallartitsisoqarsimannginnera eqqartuussisuuneqarfiup pingaartippaa.
Eqqartuussisuuneqarfiup oqaatigaa, bistandsværgemik ivertitsisoqarsimannginnera eqqartuussallu inissiisarfimmi iliuusissanik pilersaarusiuunneqarsimannginnera misiligummik iperagaatitsinissamik kinguneqartitsisinnaanngitsut.
Eqqartuussisoqarfiup aalajangiinera eqqartuussisuuneqarfiup atuuttussanngortippaa, taamaalillunilu pineqaatissiissutaasimasoq atuutsiinnarpaa.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 16. september 2020
Suliap normua: K 297/19
Eqqartuussissutit nassuiaatillu